كود – وكالات //

تنفذ حكم بجلد سيدة قدام الناس فوسط مدينة سبها جنوب ليبيا، بعد ما خرج فيديو كيبين تنفيذ العقوبة، المحكمة حكمات عليها بـ100 جلدة فقضية مرتبطة بالزنا، وتنفذ الحكم قدام الناس من طرف عناصر فالشرطة القضائية التابعة لحفتر.

الفيديو خلا بزاف ديال الحقوقيين والناشطين ينتاقدو الطريقة اللي تنفذ بها الحكم، وتساءلو كيفاش تبثات عليها التهمة، وعلاش ما بان حتى شي متهم آخر فالقضية، واش جميع الإجراءات القانونية كانت محترمة ولا لا.

https://x.com/i/status/2080288290809262454

المؤسسة الوطنية لحقوق الإنسان فليبيا قالت بلي قانون إقامة حد الزنا ما كيسمحش بتنفيذ الجلد فالشارع، وإن الحكم خاصو يتنفذ فمركز للشرطة بحضور وكيل النيابة والطبيب، وبعد ما يولي نهائي، واعتبرات اللي وقع سابقة خطيرة!

القضية رجعات حتى النقاش على طريقة تطبيق العقوبات فليبيا، خصوصاً مع تساؤلات ديال عدد من الليبيين علاش كيتنشر تنفيذ هاد النوع ديال الأحكام، وعلاش ما كيبانش تنفيذ عقوبات أخرى مرتبطة بقضايا السرقة والفساد، كيف ما تسائلو حقوقيون على الأساس القانوني والدستوري اللي استند عليه القاضي باش يصدر هاد الحكم.