گود كازا//

عرفت الاجواء شويا ديال التوتر خلال جلسة الاستماع لسعيد الناصيري الرئيس الأسبق للوداد الرياضي، اليوم الجمعة من طرف هيئة الحكم، بغرفة الجنايات الابتدائية بمحكمة الاستئناف بالدار البيضاء، وكان واقف الناصيري قدام القضاة ولابس تيشورط زرق وسروال زرق وصباط كحل، ومحسن ومرة مرة كايدير نضاضرو باش يقرا الوثائق اللي كايدافع بها على راسو قدام هيئة الحكم.

وعرفت الجلسة تدخل مرة مرة ديال القاضي علي الطرشي للتعقيب على طريقة جواب سعيد الناصيري على اسئلة المحكمة، وقله يحترم هيئة المحكمة.

القاضي كان صارم مع سعيد الناصري، وقال له: “واش باغي تسير الجلسة؟ احترم المحكمة راه هي اللي كاتسير الجلسة”، واكد القاضي وقال لسعيد الناصيري: “المحكمة ماشي تلميذ عند سعيد الناصيري، والمحكمة ماشي خصم ديالك هي حَكَم ومحايدة، ماشي خصم”.

وجاوب سعيد الناصيري، وقال انه ما كانش القصد ديالو عدم احترام المحكمة، وهو يتدخل واحد من المحامين ديالو، وقال للقاضي ان الناصيري كايهضر بحرقة وهذا الشي اللي خلاه يهضر بهذه الطريقة.