الرئيسية > آراء > القاصرين ولاو حاكمين الشارع وردوه أستوديو مفتوح ديال تيك توك والسرقة وتخريب الطوبيسات لذا خاص مبادرة وطنية وتبدى بمعاقبة واليديهم لأن أي جريمة كيديرها قاصر هي إمتداد للجريمة الأصلية لي دارو واليديه فاش ولدوه وهوما ماقادرينش يربيوه
16/02/2021 15:00 آراء

القاصرين ولاو حاكمين الشارع وردوه أستوديو مفتوح ديال تيك توك والسرقة وتخريب الطوبيسات لذا خاص مبادرة وطنية وتبدى بمعاقبة واليديهم لأن أي جريمة كيديرها قاصر هي إمتداد للجريمة الأصلية لي دارو واليديه فاش ولدوه وهوما ماقادرينش يربيوه

القاصرين ولاو حاكمين الشارع  وردوه أستوديو مفتوح ديال تيك توك والسرقة وتخريب الطوبيسات لذا خاص مبادرة وطنية وتبدى بمعاقبة واليديهم لأن أي جريمة كيديرها قاصر هي إمتداد للجريمة الأصلية لي دارو واليديه فاش ولدوه وهوما ماقادرينش يربيوه

محمد سقراط-كود///

يوقف عليك شفار عندو كثر من تلاتين عام غادي تقدر تفاهم معاه وتقدر تعطيه لي عندك ويمشي بحالو، ولكن يوقف عليك مراهق باغي يشفرك قبل مايهدر معاك غادي يضربك بالمضى ويديليك رزقك ويخصرك ويصورك ويدير من الفيديو فيلم قصير يحطو فيوتوب وتيك توك، يكريسيك ويتشهر على ظهرك، كتلقى أغلب جرائم هاد البراهش موثقينها راسهم وكيعيقو بيها وهوما نيت لي كينشروها في الانترنيت، وطبعا بسبابها كيتشدو ونشوفو ماواتهم كيبكيو، وليدي غير عقل الصغر وليدي مرضي هانتا سول عليه خالتو، دابا أصلا الزنقة ولاو حاكمينها القاصرين مكاين لي يردعم، لا واليدين يربيوهم لا مدرسة تقريهم لا منظومة إصلاحية تأهلهم، حتى ملي كتشد شي واحد فيهم ويطلع يضرب شي تلت شهور ديال الحبس كيخرج كيتخايل راسو هو توني مونتانا خاص غير يديرو عليه مسلسل فنيتفليكس.

القاصرين ولاو حاكمين الفضاء العام وكيعتابروه أستوديو مفتوح لتصوير الأفلام القصيرة و فيديوات تيك توك والتشرميل والسرقة وتخريب الطوبيسات وأي حاجة فيها المنفعة العامة، وللأسف مكاين تاحاجة لي تردعهم، ومن غير يشدهم المخزن ويسيفطهم للحبس لي كيخرجو منو بشهادات عليا ديال الإجرام وكيوليو مكيخافوش كثر من اللول، لأن داك الحبس لي كانو كيخلعوهم بيه شافوه وعرفوه مكيخلعش مادامت الحنانة غير تحوس وتجيب والخوادرية كتدير هاه و هاه وتسيفط في التروسة ديال الكارو، وخالتي البتية كتوصل حتى للشامبري، وكيخرجو صح مما كانو وأكثر تقزديرا وتاكلوشاريت، وهنا فين كيوليو يخطفو بالعلالي وباغين إس آش وآيفون وكوبرا بلا مايخدمو مايردمو، وكيتسناو يمشيو يريسكيو في الغربة، تم نيت كيحتارفو السرقة في الدوري الأوروبي.

مكاينش لي مضصر القاصرين قد واليديهم لي واخا تلقاهم فقراء ولكن موفرين ليهم كثر من جهدهم، حتى نتجو طبقة ديال القاصرين باردين لكتاف باغين كولشي وبلا مايديرو شي مجهود من غير أنهم فقط كاينين فهاد الوجود فراه يستحقو أي حاجة، والى مكانتش عندهم فراه الدولة ضدهم والبلاد مضيعاهم وواليديهم مخبيين عليهم الرزق، هاعلاش خاص أي برنامج أو خطة وطنية للقضاء على ضصارة القاصرين تستهدف واليديهم لي ولدوهم بعقلية بدوية بحال الى باقين في البادية داك اللعبة ديال الولاد كثار كيعاونو ومعاهم الرزق، بينما هوما في المدينة ساكنين فجوج بيوت وكوزينة ومراح سميتو صالون، والصالون الحقيقي ديال ولادهم هو الزنقة، هادو لي خاص يتعاقبو هوما وولادهم على أي جريمة قتارفوها هاد الأخيرين، لأن اي جريمة كيديروها القاصرين هي غير إمتداد للجريمة الأصلية لي دارو وليديهم فاش ولدوهم وهوما ماقادينش عليهم.

موضوعات أخرى

24/02/2021 20:30

جايحة كورونا زادت قلبات حال المغاربة. المورال طايح وكلشي مبرزط من صحاب القهاوي والريسطوارت وغيرهم.. وعبد الفضل لـ”كَود”: حتى لدابا معندناش رؤية وخاص الحكومة تفكر فهادشي

24/02/2021 19:30

ضروري من إلغاء القوانين اللي كتجرم المثلية وحماية هاد الفئة من العنف الأسري والمجتمعي.. تقرير كحل على أوضاء المثليين فالمغرب فزمان كورونا: تضررو بزاف بسباب حملات التشهير اللي تزامنات مع الحجر الصحي

24/02/2021 18:30

روبرتاج. عصابات “الابتزاز” مازالة فواد زم.. بعد ما طاح رونار ضحية ليهم خبراء وفاعلين حللو الظاهرة عبر “كود”: هاد الجرائم من الصعب القضاء عليها حيت سرية.. وسببها الفقر اللي كيعيشوه ولاد المنطقة