الرئيسية > كود سبور > الفيلم مزال ماسالاش. قاضي فأستراليا حكم لصالح دجوكوڤيتش وسمح ليه يدخل للبلاد وبدا كيوجد للبطولة.. و لونكيط تفتحات على شكوك فالمعلومات اللي عطاها فالمطار – تغريدات وفيديو
11/01/2022 10:00 كود سبور

الفيلم مزال ماسالاش. قاضي فأستراليا حكم لصالح دجوكوڤيتش وسمح ليه يدخل للبلاد وبدا كيوجد للبطولة.. و لونكيط تفتحات على شكوك فالمعلومات اللي عطاها فالمطار – تغريدات وفيديو

الفيلم مزال ماسالاش. قاضي فأستراليا حكم لصالح دجوكوڤيتش وسمح ليه يدخل للبلاد وبدا كيوجد للبطولة.. و لونكيط تفتحات على شكوك فالمعلومات اللي عطاها فالمطار – تغريدات وفيديو

كود سبور – وكالات //

قال نجم التنس العالمي نوڤاك دجوكوڤيتش فتغريدة فصفحتو على موقع “تويتر” : “من بعد كلشي اللي وقع، أنا ناوي نبقى هنا و نحاول نشارك فبطولة أستراليا المفتوحة”.

وزاد المصنف الأول عالميا، واللي فايت ليه ربح اللقب فمبلورن 9 ديال المرات (روكور) : ” أنا فرحان وكنشكر القاضي اللي حكم ضد قرار إلغاء الفيزا ديالي. جيت لهنا باش نلعب وحدة من أهم البطولات وقدام جمهورها الواعر”.

ورجع نوڤاك دجوكوڤيتش للتداريب، كيف قال خوه جورجي، بعدما قرر قاضي فدرالي أسترالي البارح الإثنين، “يطلق سراحو” من السونتر الخلص باحتجاز المسافرين اللي كان حاصل فيه وسط مطار ملبورن، وأكد (القاضي) عدم صلاحية قرار الحكومة بإلغاء الڤيزا ديال نوڤاك لدخول أستراليا.

وكان القاضي أنطوني كيلي، حكم بإلغاء القرار السابق للحكومة الأسترالية على الڤيزا ديال النجم الصربي، وطلب “يتطلق سراحو” من السونتر اللي “مشدود” فيه وسط مطار ملبورن، زائد أنه طلب من الحكومة تخلص جميع التكاليف.

وفالمقابل قال محامي حكومة أستراليا، كريستوفر تران، بللي إصابة دجوكوڤيتش بفيروس كورونا ما سمحاتش ليه يتعفى من قيود السفر اللي مفروضة فظروف هاد الجايحة، وكيشوف بللي قرار إلغاء الڤيزا ديال اللعاب الصريي ماكان فيه حتى شي ظلم.

و وخا دجوكوڤيتش ماعمرو تكلم علانية على واش هو شخصيا خدا الڤاكسان أو لا، ولكنه أكد لمسؤولين ديال بوليس الحدود فأستراليا أنه ما ملقحش.

وقال فأنترڤيو سابق بللي تصاب بكورونا جوج ديال المرات، وحدة شهر يونيو 2020، و الثانية نهار 16 ديسمبر 2021.

دبا من بعد الصداع اللي وقع، و أساسا الأزمة الديبلوماسية اللي ناضت بين أستراليا وصربيا، بسباب احتجاز نوڤاك فمطار ملبورن و منعو من دخول أستراليا للمشاركة فبطولتها المفتوحة للتنس، من بعد هاد “الفيلم” كلو السيد دخل للبلاد و بدا كيتريني و كيوجد يشارك.

و لكن هاد لافير مزال ماسالاتش. فحسب وسائل إعلام دولية، بدات السلطات الأسترالية لونكيط على المعلومات اللي صرح بيها وكتبها فالفورميلير ديال الدخول اللي قدمو لمصالح الهجرة فالمطار.

وجا فتقارير إعلامية أنه كاينة شكوك بللي يقدر يكون كذب بخصوص السفر ديالو لعدد من البلدان أخرى قبل ما يجي لأستراليا. ويبدو أنه كاين تناقض بين اللي صرح بيه دجوكوڤيتش وبين اللي كيروج فمواقع التواصل الاجتماعي وخاصة التصاور ديالو فإسبانيا وقبل منها فبلادو صربيا، قبل ما يقصد أستراليا من أجل المشاركة فبطولتها المفتوحة للتنس.

صحيح أن نوڤاك دخل لأستراليا ورجع كيتريني، و لكن كلشي كيتسنا نتائج لونكيط اللي تفتحات واللي تقدر تقلب كلشي من جديد.

هادشي كيعني الاحتمال ديال إلغاء الڤيزا ديالو وترحيلو من أستراليا مزال ممكن يوقع فأي وقيتة خصوصا إيلا ثبت أنه كذب فالمعلومات اللي قدمها للسلطات الأسترالية قبل ما يدخل للبلاد.

موضوعات أخرى

20/01/2022 22:28

“الريزو” ديال تحويل العملات الرقمية والاختطاف والاحتجاز.. الفرقة الوطنية لقات فلوس صحيحة عاود تجاوزات 10 ملايين درهم