كود -سبور //

قررات الفيفا دير مبادرة جديدة فمونديال 2026،  مني غادي تعطي المنتخب اللي غايربح كأس العالم سوفونر خاص مع الكاس والميداليات الذهبية، هاد الفكرة كتشابه مع التقاليد فعدد من البطولات الرياضية الكبيرة فمريكان حيث كيتعتبر الخاتم رمز للنجاح.

وقالت فيفا بلي هاد الخواتم غادي تكون إصدار محدود ديال 30 خاتم د لعابة وطاقم ، كيف ما غادي تباع 1996 خاتم بالنسبة لي لمشجعين اللي باغين يحتافظو بسوفونير تاريخي من مونديال 2026.

الخاتم غادي يكون فيه من جهة تصميم كأس العالم، ومن الجهة الثانية غادي يتحط شعار وهوية المنتخب اللي توج باللقب ،وكل خاتم غادي يتصاوب على حسب عبار الشخص اللي غادي يلبسو، وغادي يكون مرفوق بشهادة ديال الاصل.

ومني غادي يسالي الماتش غاياخدو لعابة خواتم شكليين اما النسخ النهائية غادي تتوجد من بعد، وتسلم لباقي لعابة وأفراد البعثة مورا ما يسالي  تصنيعها ،هاد الخطوة كتعتبر الأولى من نوعها فتاريخ كأس العالم، وكتزيد رمز جديد لتخليد إنجاز المنتخب اللي غادي يتوج بلقب مونديال 2026.