كود سبور//

كشف الاتحاد الدولي لكرة القدم، على لائحة الوداد الرياضي اللي حط الفريق باش يشارك فكأس العالم للأندية فالميريكان بين 14 يونيو و13 يوليوز 2025.

ومتكونة اللائحة الرسمية ديال الوداد الرياضي فمونديال الأندية من الگوال بثلاثة مهدي بنعبيد، يوسف المطيع، عمر أقزداو، والمدافعين جمال حركاس، عبد المنعم بوطويل، فهد موفي، أيوب بوشتة، ماكس ماييرز، محمد مفيد، غيليرمي فيريرا.

ووسط التيران فيه مهدي مباريك، زكرياء فتحي، تمبينكوسي لورش، إسماعيل مترجي، أسامة الزمراوي، إسماعيل بنقطيب، بيدرينيو، ارثر فيندروسكي، والهجوم فيه عزيز كي، محمد رايحي، نور الدين أمرابط، صامويل أوبينگ، ميكايل مالسا، سليمان مواليمو، كاسيوس مايلولا، حمزة هنوري، أحمد غيلوف، عمر السومة.

وبداو الوداد الرياضي كايوجدو فالميريكان لكأس العالم للأندية، ودارو الأربعاء فالعشية ديال الميريكان اللي هي نص الليل فالمغرب أول حصة تدريبية وكانت فلاصال.

وطايحين الوداد الرياضي فالگروب 7 من كأس العالم للأندية، وأول ماتش عندهم يوم 18 يونيو 2025 ضد مانشستر سيتي النگليزي، والثاني ضد يوفنتوس الطالياني، الثالث ضد العين الإماراتي.