گود سبور//

وجه الاتحاد الدولي لكرة القدم، ضربة خايبة للجنة الحكام بالاتحاد الافريقي لكرة القدم، باستبعاد حكم نهائي كاس أفريقيا 2025، من المشاركة فمونديال 2026.

وكان مرشح الحكم جون جاك ندالا من الكونگو الديمقراطية لقيادة ماتشات فكاس العالم 2026، ولكن الاتحاد الافريقي لكرة القدم حيدوه من لائحة الحكام اللي غادي يكونو فالمونديال، وهذا فيه إشارة إلى الفضيحة الكبيرة اللي وقعت ففينال كاس افريقيا 2025، ملي انسحب منتخب السنغال من النهائي امام المنتخب المغربي، بلاما يدير حتى شي حركة قانونية، قبل ما يرجعو السنغاليين للتيران يكملو المباراة، ومن بعد گر رئيس لجنة الحكام بالكاف فاجتماع المكتب التنفيذي انه هضر مع الحكم فهاديك اللحظة ملي انسحبو السنغال، وقاليه يخرق القانون بعدم الإعلان على نهاية الماتش وما يعطيش بطائق صفرين للاعبين السنغال.

للإشارة فالمغرب غادي يكون ممثل فكاس العالم 2026، بأربعة حكام، هما جلال جيد كحكم ساحة ورجع بذلك التحكيم المغربي للساحة فكاس العالم بعد غياب طويل على قيادة الماتشات من وسط التيران، وزكرياء برنسي ومصطفى اكركاد كحكمين مساعدين، وحمزة الفارق غادي يكون فالفار.