گود سبور//

تسببت الفضيحة اللي دارها منتخب السنغال ففينال كاس إفريقيا “المغرب2025″، أمام المنتخب الوطني المغربي، ملي انسحبو من الماتش فتيران مولاي عبد الله حيث الحكم علن على بينالتي للمغرب قبل ما يرجعو يكملو اللعب، (تسببت) فتعديلات على قوانين من طرف الاتحاد الدولي لكرة القدم، باش ما يبقاش يتعاود بحال هذا الحادث، والفيفا برئاسة السويسري جياني انفانتينو اللي كان حاضر هذاك الفينال فالتيران، غادي يكونو صارمين مع أي لاعب حاول يدير كيفما دارو لاعبين السنغال، واللي فاللخر خسرو الكأس بقوة القانون أمام المغرب بقرار من لجنة الاستئناف بالكاف، اللي اعتبرت السنغال منسحبة وقضت بخسارتها بنتيجة 3-0.

وفإجتماع كان اليوم فكندا ديال مجلس الاتحاد الدولي لكرة القدم، تمت الموافقة على جوج مقترحات تعديل القوانين في انتظار الإعلان عليهم باش يتطبقو ابتداء من كاس العالم 2026، وهما طرد أي لاعب قرر يخرج من التيران احتجاجا على قرارات الحكم وينحسب كيفما انسحبو لاعبين السنغال، وطرد أي لاعب غطا فمو بيدو، وهذا الشي لمكافحة العنصرية حيث عدد من اللاعبين كايغطيو فامهم باش كايسبو المنافسين ديالهم ولا يقول لهم شي عبارات عنصرية بحال حادث الأرجنتيني جيانلوكا بريستياني لاعب بنفيكا البرتغالي اللي تاهمو البرازيلي فينيسيوس جونيور بأنه عايرو وقاله “قرد”.

هاد القوانين التحكيمي غادي تخضع لتقدير الحكام ملي يكونو لاعبين الماتشات، بحال كاع القوانين اللي من اختصاص الحكام يقرروها.