كود سبور//

اختار الاتحاد الدولي لكرة القدم “الفيفا”، يفكر المتابعين ديالو فالعالم بالبيت الواعر اللي ماركا الدولي المغربي يوسف النصيري على الصبليون، فكأس العالم روسيا 2018، وتوقع يماركي مرة أخرى فكأس العالم قطر 2022.

الاتحاد الدولي نشر فيديو ديال بيت القناص النصيري على ديخيا لكول ديال الصبليون قدام الدفاع اللي فيه العملاق راموس واللي قى كيتفرج ووصف الفيفا” النصيري بالطيارة.

وقال الاتحاد الدولي فتغريدة على تويتر : “هكذا حلق يوسف النصيري فوق سيرخيو راموس وماركا بيت مميز فمرمى الصبليون.. واش غادي نشوفوه كيهز الشبكا فقطر2022 ؟ “.

للإشارة فيوسف النصيري نجم اشبيلية الصبليوني كيبقى من اللعابا اللي كيعول عليهم الناخب الوطني وليد الركراكي فكأس العالم قطر 2022، باش يماركي ويفرح المغاربة ويكون حاسم فمنح المغرب التأهل إلى الدور الثاني من المونديال عن المجموعة 6، اللي فيها كرواتيا وبلجيكا وكندا.