وكالات//

فخطوة ماشي مألوفة وبغرض يواجه الشكوك اللي دايرين على قدرات الروبوتات البشرية، تشاو تونغيانغ، المدير التنفيذي ديال شركة EngineAI الصينية، شارك فيديو فـإنستغرام كيبان فيه وهو كيتلقى ركلة قوية من الروبوت الجديدT800، فـتجربة علنية دارت ضجة كبيرة فالإنترنت.

الفيديو كيبان فيه تشاو لابس واقيات فالرأس والكرش والرجلين، وكيهضرو وكيضحكو معاه فريق العمل قبل ما يضربو الروبوت بركلة مباشرة فكرشو، وكيطيحو للأرض وسط تعليقات ساخرة. من بعد قال: راه عنيف وقاصح بزاف”.

https://www.instagram.com/reel/DR7C3kMEz4b/?utm_source=ig_embed&ig_rid=06c30471-57dd-4e0a-bdf3-8c0ccfb7708f

هاد التجربة جات مكملة لفيديو سابق نشراتو الشركة، كان فيه الروبوت كيدير حركات قتالية فقاعة ديال الملاكمة، ولكن بزاف ديال المتابعين شكو فالمصداقية ديالو وقالو راه غير مؤثرات بصرية (CGI)، وهاد الشي خلا الشركة دير هاد التجربة الجديدة باش تبين باللي الأداء حقيقي.

وفـتصريح رسمي، قالت الشركة باللي الهدف من هاد التجربة هو استكشاف “الإمكانيات الحقيقية ديال الطرازT800″”، ولكن ما وضحاتش واش الروبوت خدام بوحدو ولا متحكم فيه عن بُعد.

هاد الخطوة جات فواحد الوقت اللي كيشهد تطور سريع فالروبوتات البشرية، بحيث قدرت EngineAI تجمع تمويل قدره 180.69 مليون دولار فدجنبر 2025 من مستثمرين كبار صينيين، وكتخطط توسع استعمالات الروبوتات ديالها خلال سنة 2026، بهدف تطوير الصناعات وإعادة تعريف العلاقة بين الإنسان والآلة.