سهام البارودي كود//

يا على مستوى عبرو عليه بعض الفنانين المغاربة لي ناضو باغين يتعاطاو مع ديك هالة سرحان! زعما راه كايدافعو على “بنت بلادهم” كان كايصحابني الدزاير لي عندهم فحال هاد العته صدقو تاحنا عندنا شي معتوهين اقود منهم.

دابا المشكل لي عندي أنا شخصيا هوا علاش حسّو بلي خاصهم يتحاماو أولا؟ القضية قضية شخصية بين مرا و راجها ماشي بين فنان وفنانة باش تالابغيتو دخلو المداخلة ديالكم يكون عندها شي دور، ونقولو حنا گاع دارت تدوينة مسيئة للبلد وا راكم عاد ماكاتزيدو ديرو فهاد البلاد الضحك بالعته ديالكم.

ثانيا كون غا كانت المحامية ديالهم كاتحمّر الوجه، راه الهجاء والمعاطية والمشاطية تاهوما فن عندو ناسو لّي كايعرفو ليه، المعاطية خاصها ذكاءها أولا وثقافتها وأسلوبها! نتوما كاملين نايضين كاتعايرو السيدة بالسّن ديالها وا الشارفة وا الهارفة وا المهلهلة وا المترهّلة! وا الحومّاق واش مازال شي واحد كايعاير المرا بالسّن ديالها ف2025 !؟ وا راه صدق عندكم فقر إبداع مزمن كايقيس جميع مناحي الحياة! لا فن كاتقنوه لا معاطية كاتصرعوها! نتوما مايديركمش الواحد فكتافو بتاتا!.

وا سيرو هاد المحامية لي درتو على هالة سرحان سيرو ديروها غا فالدومين ديالكم وطوروه وطورو من راسكم! هاهوا رمضان جاي وغايبداو ثاني السرقات الفكرية والحموضة والكوميديا الهزيلة! هاهوا رمضان جاي وغانتفرجو فهاد الگروح لي فيكم واش كاتعرفو ديروه فالخدمة والإبداع ولا كيما العادة “مفضّيين”.

هادي هي خلاتو ممدود ومشات تعزي فمحمود!