عمر المزين – كود////

تأكيدا للخبر اللي نشراتو “كود” البارح الثلاثاء على الزيارة اللي دارتها الفنانة الأمريكية مادونا للعاصمة العلمية فاس، نشرات هاد الفنانة العالمية المشهورة تصاور ديالها ف بواف ديال لبلايص.

مصادر “كود” كشفت باللي الفنانة مادونا نزلات فمطار فاس سايس ومشات مباشرة لأزقة المدينة العتيقة ديال فاس اللي حمقاتها بزاف، ومكانت باغية حتى شي حد يعرفها كاينة.

وذكرات المصادر باللي الفنانة العالمية عرفوها شي كروب ديال السياح كانوا دايزين ف المدينة العتيقة ومشاو تصورو معاها وخا هي مابغات حتى حد يقرب ليها او يتصور معاها.

أكيد مني مشاو شي سياح ياخدو تصاور معاها، كتقول مصادر “كود”، كولشي مشا كيسول على شكون هاديك حقاش الملامح ديالها تبدلات بزاف، وغير سمعو هاديك هي مادونا بغاو ياخدو تصاور لكن كان ممنوع. مصادرنا كشفت باللي كان معها فريق أمني تابع للفرقة الأمنية السياحة وكان رئيس هاد الفرقة معها مع عنصر تابع ليه.

الفنانة مادونا مشات لمدرسة البوعنانية اللي تعتبر من أشهر المدارس ففاس، وكتتميز بتصميم زوين بزاف، وفيها محارب مخصص للصلاة ومزين بزخارف هندسية ونباتية والزليج.

ودارت هاد الفنانة العالمية دورة مع شي ناس كانوا معها فقلب لمدينة لقديمة ديال فاس، ومشات لقصر المنبهي اللي كاين فالطالعة الصغيرة (سويقة بن صافي). هاد القصر هو قصر تاريخي كيرجع تاريخ تأسيسو لأوائل القرن العشرين. وهو المكان اللي تم فيه التوقيع رسميا على المعاهدة ديال فاس عام 1912.

مادونا شربات تما كاس ديال أتاي وعجبها الحال بزاف، وخدات تصاور تذكارية لراسها، في حين حتى شي براني مقرب ليها او خدا شي تصاور معاها. حسب عدد من الناس لي شافوها فهاد الخرجة اللي دارت.

فاس حمقاتها ودبا مشات لمراكش باش تدوز تما احتفالات رأس السنة. كتقول مصادر “كود”.