وكالات//

دارت أنباء احتجاز الفنانة الجزائرية المشهورة بيونة من طرف جارتها ضجة كبيرة في الأوساط الفنية وفي الرأي العام فالجزائر.

القصة ديال الفنانة بيونة ولات حديث الناس بعدما عائلتها دارت نداء استغاثة وطلبت فتح أونكيط سريع باش يتم إنقاذ الفنانة.

وحسب وسائل الإعلام الجزائرية، القصة بدأت من تصريحات الممثلة نوال زعتر، اللي قالت إنها ماقدراتش تزور صديقتها بيونة بسبب أن جارتها حجزت لها التلفون ديالها.

نوال أكدت أنها حاولت تتواصل مع بيونة بزاف ديال المرات ولكن كل مرة كانت الجارة هي اللي كتجاوب وكتمنعها من التواصل مع بيونة، وزادت وأكدت على الحالة الصحية الحرجة للفنانة.

وبعد تصريحات نوال زعتر، خرجت بيونة في فيديو وقالت إن جارتها كتهتم بيها وبصحتها، وأكدت أنه ما كانش خاصها تصرح بهاد الطريقة.

من جهة أخرى، آمال شعلة، بنت الفنانة بيونة، دخلت على الخط ووجهت نداء استغاثة باش ينقذوا والدتها، وقالت أنها محتجزة من طرف جارتها 3 سنين هادي.