كود الرباط//

التخربيق والسيبة اللي ولا مقرون بوزارة الاتصال والشباب والثقافة لا حدود ليهم، ووصل حتى أنه ولاو صفحات ديال جوج دريال مقرون اسمهم ببوابة المملكة ماروك.ما.

هاد السيدة بشرى اللي مقيمة فكندا، وولات خيطي بيطي للمغرب باش تصور شي حاجة، ما هي كبسولات ما هي روبرتاجات ما هي ثرات، ولات تتحط الفيديوهات مولاهم وزارة الثقافة، زعما، فصفحتها على إنستغرام وكتطاغي فيهم صفحات كتحط الخبار ديال كل من هب ودب، والمكفس فهادشي أنها كتطاغي حتى البوابة الرسمية للمملكة المغربية، باش تشوفو الفوضى اللي واقعة، حنا مملكة آلاف القرون نتسناو كونط واكح ما عرفنا شكون موراه يروج للبلاد.

هاد الصفحة ديال ثرات المغرب اللي نافخاها هاد السيدة اللي اسمها بشرى بصفحات انستغرامية، ووصلاتها 340 ألف متابع والمشاهدات ديال الكذوب، راه معيورة فحق المغرب. ولكن حتى لهنا يقدر يجيكم أمر عادي، ولكن لي ماشي عادي هو اللي انبداو فيه دابا.

هاد السيدة، اللي بالمناسبة دفعات مجموعة من الصفحات باش يشوشو على عزيز أخنوش رئيس الحكومة من هادي عام دابا، وما عرفناش واش بفلوس وزارة الثقافة ولا مسخرة لشي حد، هي من ناس المقربين ديال السيهم المهدي بنسعيد، واللي ظهرات معاه فمبادرة جيل 2030، وفينما مشات نهار إطلاق المبادرة لاسقاه باش يمول ليها داك التشختين اللي ما كيشوفو حتى واحد، واللي كينفر الناس بصوتها.

الغريب هاد الأخت عمرها دوات على انتمائها من قريب ولا من بعيد لحزب الأصالة والمعاصرة، واللي فينما كان شي سبان فرئيس الحكومة هاد ليام كتلقاها دايرا ليه لايك وبارطاج، وكملاتها كتسب حتى زملاء صحافيين محترمين. وهنا كنطرحو التساؤل واش السيهم بنسعيد ما طالقش المسخرين ديالو باش يشعلو العافية فالبلاد كثر ما هي شاعلة؟ وكثر من هادشي واش باقي شي سياسي يتيق فبنسعيد والحزب ديالو مستقبلا ويقدر يتحالف معاه؟.

https://www.instagram.com/bouchra.ennokra/p/DSFOzurjJYm/