عمر المزين – كود////

كتواصل بلادنا، للسنة الـ11 على التوالي، الحضور ديالها فواحد من أكبر المواعيد العالمية ديال الفلاحة والتغذية، من خلال المشاركة فـ الأسبوع الأخضر الدولي ببرلين، المنظم ما بين 16 و25 يناير 2026 بالعاصمة الألمانية برلين، واللي كيجمع فاعلين ومهنيين من مختلف بقاع العالم.

وفتاريخ 16 يناير 2026، أشرف وزير الفلاحة والصيد البحري والتنمية القروية والمياه والغابات، أحمد البواري، على الافتتاح الرسمي للجناح المغربي، بحضور الوزير الاتحادي الألماني للفلاحة والتغذية والهوية الجهوية ألويس جورج جوزيف راينر، إلى جانب ممثلي سفارة المملكة المغربية وعدد من المسؤولين والمهنيين فالقطاع الفلاحي.

الجناح المغربي جا قوي ومتنوع، حيث ضم حوالي عشرين رواق، كتقدم منتوجات مجالية ديال 20 تعاونية كتمثل جهات المملكة الـ12، وكتعكس الغنى الفلاحي والتنوع المجالي اللي كيميز المغرب. الزوار كانو على موعد مع تجربة مغربية متكاملة، من تذوق أطباق تقليدية، لعروض فالطبخ، وأنشطة ثقافية كتجسد أصالة المطبخ المغربي وتراكم الخبرة ديال التعاونيات عبر السنين.

المشاركة المغربية جات تحت شعار التميز، مع تركيز واضح على الجودة وتثمين المنتوجات المجالية، اللي كتحترم أعلى المعايير الدولية ديال السلامة الصحية وقابلية التتبع، الشي اللي كيعكس المجهودات الكبيرة اللي كتقوم بها التعاونيات المغربية باش توصل المنتوج المحلي للأسواق العالمية بثقة وتنافسية.

وعلى هامش فعاليات الأسبوع الأخضر الدولي وأشغال المنتدى العالمي للغذاء والزراعة، دار الوزير لقاءات ثنائية مع وزير الفلاحة والتنمية القروية بجمهورية بولندا ستيفان كراييفسكي، ومع وزيرة الدولة المكلفة بالبيئة والتغذية والشؤون القروية بالمملكة المتحدة أنجيلا إيغل، واللي تمحورت حول تعزيز التعاون فالميادين الفلاحية والغذائية والقروية، خصوصاً فمجالات الأمن الغذائي، وتدبير الماء، والتكيف مع التغيرات المناخية.

اللقاء مع الجانب البولندي تميز بتوقيع مذكرة تفاهم بين الجانبين، كتهدف لتعزيز التعاون فمجالات الصحة الحيوانية والسلامة الصحية للمنتوجات الحيوانية ومشتقاتها، فخطوة كتأكد على الدينامية الجديدة فالعلاقات الفلاحية الثنائية.