كود سبور//

خلق الدولي المغربي السابق مراد حديود والعضو فالعصبة الوطنية لكرة القدم الاحترافية جدل جديد بتدوينة أقل حاجة يمكن وصفها أنها عنصرية، فالوقت اللي خاص يكون مثل يحتذى به التوعية ونشر مبادئ التعايش كلاعب سابق ومسؤول فجهاز الكورة.

وخرج مراد حديود اللي سبق له تمسخر على مهاجم المنتخب المغربي يوسف النصري قبل عامين، خرج هذه المرة ونشر تدوينة خايبا بزاف على لاعبين منتخب فرنسا، وحط تصويرة كايبانو فيها غير اللاعبين الفرنسيين اللي لون بشرتهم بيض واللاعبين السمرين ما باينينش بالضلام، وقال عليها: “تشكيلة المنتخب الفرنسي إلى طفينا الضو”.

هاد التعبير اللي دار مراد حديود خاصو يعرف انه فيه تمييز عنصري وانتهاك لحقوق الإنسان والتعايش بين البشر، وكاتمس صورة الكورة المغربية هي الاولى حيث هاد حديود هو عضو فالعصبة الوطنية لكرة القدم الاحترافية، واول حاجة خاص يديرها المكتب المديري ديالها برئاسة عبد السلام بلقشور هي احالة هذا العضو على اللجان المختصة بسبب هاد الأفكار العنصرية اللي كاينشر، خصوصا وانه كانت عندو سابقة نهار نشر تدوينة ملغومة على يوسف النصيري مهاجم المنتخب المغربي قبل عامين وعايرو ملي قاليه: “لجنة مكافحة المنشطات فالفيفا تطالب النصيري بتناول المنشطات”، وملي شغف الطرح سخن وكبر عليه خاف وخرج فالمنابر الصحافية يطلب المسامحة.