محمد سقراط-كود//

الفساد والنزاعات السياسية والمد الوهابي والهجرة القروية والجفاف، وغياب رؤية واضحة لتحديث او تطوير المغرب، خلق في البلاد كوارث اجتماعية خاصها واحد الخمسين عام خرى باش تعالج، العهد ديال محمد السادس واحد من أزهى الأوقات في تاريخ المغرب، حقا حاصلين في داك مية وربعين مليار ناتج داخلي خام هادي سنوات، ولكن المغرب عرف تطور كبير مشاريع تنموية واجتماعية عمر المغاربة كانوا يحلموا بيها، حاليا المغرب كامل عندو تغطية صحية وأسر كثيرة عندها دعم من الدولة، واحد ناشرهم في القهوة تقدر تجيه خمسمية درهم والو. ولكن في الواقع راه فيها جوج تقديات من سوق اسبوعي بطحينهم بدجاجهم بخضرتهم بكاع داكشي لي محتاجينو، وحقا راها عتقات ناس كنعرفهم كانوا عايشين غير بالمحسنين والجيران معاونين معاهم.

ولكن للأسف الوحلة لي واحل حاليا المغرب هي مع تصحيح أزمات التماتينات والتسعينات وحتى الالفينات، فين طغات في المغرب عقلية العشوائي والبرارك كاريانات والاحياء الهامشية. بحال نيت الحي الحسني أي طاحت فيه الدار هاد الأيام وتسببات في عشرة قتلى، راه فايت طاحت فيه دار خرى، وفاش كيسمع الواحد دار من خمسة طوابق وستة كيتخايل عمارة وهي راه غير بنادم كيبني طالع مع الكدية بالعشوائي مطلع ناطحة سحاب بجوج خناشي ديال السيمة والتراب، الحيوط كلهم كيتفرتو، راه غير البريك مستف فوق بعضياتو والتراب، ومكاين غير بني وعلي، السانكيام والسيزيام، أصلا مدينة فاس أجمل الروابي المطلة على المدينة ولي كان خاص تكون منتجعات واحياء سكنية راقية، وقع العكس كتلقى هاد البلايص هوما اخطر احياء المدينة وأكثرها فقرا وتهميشا، وراه مكاين حتىزفرق بينها وبين الفافيلات ديال البرازيل من غير السلاح، اما حتى المخدرات موجودين وبالانواع والاشكال.

طنجة لي من المفروض تكون وحدة من اجمل مدن العالم نظرا لموقعها راه اغلب احيائها العامرة مبنية بالعشوائي، راه حتى لي عندو الرخصة مثلا ديال طابق ولا جوج كتلقاه باني ربعة، وكاين احياء كلها عشوائية بحال حومة الشوك والحومة العالية وجزء كبير من مغوغة والعوامة وبيرشيفا والعديد من الاحياء مبنية بلا تخطيط عمراني، شي مشرق شي مغرب كل دار ولونها وشكلها والزناقي ضيقين وعشوائيين، هادشي كامل راه نتيجة عشرات السنين ديال الفساد وانعدام الإرادة السياسية لتطوير المغرب، والنتيجة هو خاص عشرات السنين خرى باش تقدر تعالج هاد الظواهر، الحي الحسني كمثال باغي غادي يريبو فيه الديور، وهادوك الناس راه فات فيهم الفوت واخا تحولهم غادي يخلقوا گيتو في بلاصة خرى وصافي، خاص سياسات اجتماعية كتفكر للمدى البعيد على الأقل واحد الجيل في المستقبل يقدر يخرح مقاد، ماشي تواصل إعادة انتاج البؤس لمالانهاية.