كود سعيد الشاوي ///

البام كيخرج من ازمة يدخل لاخرى. بعد فضيحة صلاح ابو الغالي اللي كان احد اعضاء القيادة الثلاثية للحزب واللي فيها رجعات بنت الباشا فاطمة الزهرا المنصوري منسقة هاد القيادة الجماعية٬ قاضية ونصفات مول لفروماج لملايري عبد الرحيم بن الضو وطردات ابو الغالي. قضية تجارية تحولات لقضية حزبية وتمت ادانة ابو الغالي لانو باع ارض لابراهيم مجاهد رئيس جهة بني ملال سابقا=كلهم هادو من البام= بعد ما كان دار وعد بالبيع لمول لفروماج. 

كيف شفتو حتى حاجة من هاد الشي كيتهم لمغاربة. غير البيع والشرا. هادي هي الصورة اللي عطاها الحزب للرأي العام وتقوات باش التراكتور تحول لفضاء كيبث فقضايا بلاصتها المحاكم.

هاد الزلزال مازال لان ابو الغالي مشى للقضاء. طلعات فضيحة اخرى كتهم راجل بنت الباشا اسمو البركة. هادا حسب رئيس جماعة من البام٬ بغى يستولي علي اراضي ديال الدولة قريبة فين كاين ضريح عبد السلام بن مشيش. بنت الباشا دافعات على راجلها وطردات رئيس الجماعة من البام. دخل الشخصي فتصفية حسابات اعضاء التراكتور.

فضيحة ثالثة هاد المرة دعمات فيها بنت الباشا الجهة المدانة قضائيا. هاد القضية هي فضيحة الليموري عمدة طنجة المعروفة ب”العمدة مون بيبي”. قبل اسابيع محكمة طنجة شخص اسمو المزدوجي وهو مستشار عمدة طنجة بعامين ونص حسب نافذ مع الغرامة وتعويض ب48 مليون سنتيم. هادا متهم ببث وتوزيع ادعاءات كاذبة بهدف المس بالحياة الخاصة للأشخاص والتشهير بهم، وبث وتوزيع ادعاءات كاذبة بهدف المس بالحياة الخاصة لامرأة بسبب جنسها، والتشهير والتهديد والتمييز بسبب الانتماء، والسب والقذف العلني في حق امرأة بسبب جنسها. ودانتو كذلك ب 48 مليون سنتيم مقسمة على أربع ضحايا.   

فضيحة العمدة وادانة للامين الجهوي ديال حزب التراكتور عبد اللطيف الغلبزوري. بجوجهم يوفرو الحماية للمتهم للي سبق ترشح معاه فانتخابات مجلس الجهة الاخيرة (2021)، ودابا مستشار الليموري فالجمعية المغربية ديال رؤساء الجماعات المحلية وعضو فالكتابة الإقليمية ديال حزب التراكتور. 

واخا الادانة ولفضايح دعماتو بنت الباشا. تصورو محكوم فالقضاء كدافع عليه وابو الغالي مازال ما وصلش القضاء ودانتو وجرات عليه.
هاد القضايا كلها وقعات فمدة قصيرة هاد ليام. 

حتى بعد تشكيل الحكومة تفجرات فضايح اخرى. وزير الاتصال والشباب والاعلام بفلوس الدولة كيعطي فلوس كثيرة للصحافة باش دافع عليه. ومخلص شركة باش تسينيالي صفحات صحف وجرائد كتنتاقدو. تصورو فين وصل التراكتور؟ بفلوس الدولة كيدير عمل قذر.

وجات فضيحة اخرى وكلها كتزيد تبين طبيعة هاد الحزب. وزير منهم ديال التعليم العالي اسمو الميداوي وبعد ما بغاش يسلم فتسليم السلط على سابقو الميراوي عبد اللطيف باسلوب ما عندو علاقة بوزير ولا برجل دولة ولا حتى بمواطن كيحتارم راسو٬ خرج قال باللي لغى عقد مع اوطيل فالرباط قيمتو 62 مليون سنتيم كيوفر وجبات غذائىة ل8 اشخاص يوميا بعضهم ما عندو علاقة بالوزارة. وقال باللي 21 تلفون غالي و16 طابليت و60 كارطا ديال الگازوال غبرات بعد تبادل السلط. 

اش كيقول هاد لوزير ديال التعليم العالي للي من البام؟ كيقول باللي ميراوي ديال البام فاسد. اتهام واضح لهاد الحزب من داخل الحزب بالفساد. 

واخا ميراوي قال باللي كذوب هاد الهدرة وباللي ما عندو حتى نفقات وعقود مع أوطيل كذوب ولا أساس له من الصحة ولكن القضاء او المجلس الاعلى للحسابات هو اللي خاصو يبحث ومن بعد يؤكد او يكذب ماشي الوزير السابق.

هاد الفضيحة كتزيد تأكد كيفاش رجع حزب تولد بطريقة غريبة. حزب كيبان كيرعى الفساد. البام زمن بنت الباشا ولوزير بنسعيد المشغول بصفقات وزاراتو