الرئيسية > آراء > الفساد خطير بحالو بحال الإرهاب خاص التعامل معاه بنفس الصرامة المدير ديال لاراديف فاس لي ابتز وشفر المقاولين في خمسين مليون مستحيل مايكونش شفر الضوبل من فلوس الدولة أي ضرائب الطبقة الوسطى
12/10/2021 16:00 آراء

الفساد خطير بحالو بحال الإرهاب خاص التعامل معاه بنفس الصرامة المدير ديال لاراديف فاس لي ابتز وشفر المقاولين في خمسين مليون مستحيل مايكونش شفر الضوبل من فلوس الدولة أي ضرائب الطبقة الوسطى

الفساد خطير بحالو بحال الإرهاب خاص التعامل معاه بنفس الصرامة المدير ديال لاراديف فاس لي ابتز وشفر المقاولين في خمسين مليون مستحيل مايكونش شفر الضوبل من فلوس الدولة أي ضرائب الطبقة الوسطى

محمد سقراط-گود///

نهار ستقبل الملك الحكومة باس يعينها قلت مع راسي عالله يلاحظو بلي فاس مدينة مظلمة والانارة العمومية فيها ضعيفة إلى منعدمة فشي بلايص، وحتى جودة الاضائة باهتة وخافتة بحال الى شاعل شمعة باش تضوي ملعب ديال الكورة، وطبعا نهار تطفى شي بولة في الشارع وتبغي البلدية او لاراديف يجيو يبدلوها تما بقيتي، وراه بزاف ديال الديور دايرين بولة في باب دار بسباب هاد المشكل باش يضويو على الزنقة والملك العام، بالاظافة الى أن جزء كبير من الخراب ديال الطرق لي كتعرفو فاس بسباب لاراديف لي ديما فين ماحفرو شي بلاصة عمرهم مكيردوها كيف كانت ، وطبعا ملي كتطيح الشتا المدينة احياء كثار كيغرقو فيها بحال أي مدينة مغربية في الثمانينات ماشي في 2021  لي خاص كنية كبيرة ديال الشتا عاد يقدرو يوقعو فياضانات.

لاراديف ديال الدولة يعني السليت من الخدمة وتاشفارت خدامين على الجهد وطبعا فيها ناس نزهاء بحال أي إدارة، وكتلقاهم كيبدلو مجهود كبير باش يحافظو على هاد النزاهة بسباب الاغرائات، راه بحال بزاف ديال الإدارات الموظق لي مكيشدش الرشوة كيكون هو الاستثناء ماشي العكس وتقدر تلقاه مكروه من طرف الزملاء ديالو، لانه ماغاديش معاهم في الخط والاستثناء ديالو كيشكل عليهم خطر، سبقلي خدمت في سطاسيون ديال المازوط وعشت وشفت كيفاش اغلب الطوموبيلات ديال الدولة كانو كيجيو يبيعو البونات، وكيفاش اغلب حديد الشركات كيزيدو الثمن في البونات، واحد كان كيفرق غير منعش في سي كانز كيدير خمسين درهم ديال المازوط كيقولينا نكتبو ليه سبعين، اما الحديد التقيل حدث ولا حرج، عاد الحديد ديال الولاية والعمالة والجماعة كيبيعو البونات بنص ثمن المهم النهب والفساد، ومن داك الوقت ديما كنشوف في الحديد التابع لشي إدارة ديال الدولة كنشوف فيه غير فلوس البلاد كتضيع هاكاك بلا حسيب بلا رقيب، هكاك فاش كيبان ليا اسطول الطوموبيلات ديال لاراديف كيدور في فاس من قهوة لقوة كنشوف فيه فلوس كثيرة ضايعة غير هكاك وفاس مخربة، عاد خلي عليك الهموز والصفقات والتبديد والضياع على مستوى عالي ولي كيوصل للملايين دالملايين.

وطبعا مخابش الإحساس ديالي هاد الأيام تشد المدير ديال لاراديف في فاس متلبس في رشوة ديال جوج دالمليون مشاو معاه للدار لقاو خمسين مليون كاش محطوطة، بغيتي شي صفقة مع لاراديف واخا ديال الجفافات خاصك ترشي المدير، هادشي غير لي سرق من الشركات اما لي سرق من الدولة التحقيق لي غادي يعلن شحال، مستحيل مدير حاصل شافر الملايين من المقاولين ميكونش شفر الضوبل من الدولة ومن فلوس الطبقة الوسطى المهلوكة ضرائب ، لنفرض كون مكانش هاد المقاول لي قهرو هاد المدير بالابتزاز وناض علم بيه السلطات وكوغطوه كان غادي يبقى هاد المدير غادي هاكا عاطيها  لابتزاز والفساد  السيد يالله جا في شهر مارس باقي عام مكملو في المنصب جمع خمسين مليون كاش في الدار، بهاد الوثيرة كون ضرب شي خمسنين في فاس كان يولي يتذكر في فوربس مع اغنياء المغرب، خاص تحقيق معاه ومع لي قبل منو ومع لي بحالو في كاع الإدارات والوكالات ولي يسرق فلوس الدولة في فاس راه يسرقها في وجدة ومكناس ، والى الداخلية مكلفة بهادشي دابا ايوا تبين لينا ، راه الفساد خطير بحالو بحال الإرهاب، نفس المجهود لي كيتدار في محاربة الإرهاب خاص يتدار في محاربة الفساد.

موضوعات أخرى

23/10/2021 15:00

هادو لي كيقولو دابا جسدي حريتي باش مايلقحوش هوما لي كيعلمو البوليس ملي كيشوفو شي جوج محابين في الله داخلين يبرتشو في العمارة وهوما لي كيلومو أي وحدة تعرضات للتحرش بدعوى هي ماستراش راسها

23/10/2021 13:30

روشيرشي من الأنتربول.. بوليس طنجة حطو بارون المخدرات “حمبلي” تحت حراسة مشددة وسط كلينيك بعدما شرملوه شي وحدين بالجناوة البارح فـ أشقار

23/10/2021 12:00

علاش العلاقات المغربية الإسبانية مزال واقفة ومابغاتش تزيد الكَدام؟.. هادي سوارتها السحرية اللي ماباغاش إسبانيا تستعملهم