كود سبور//

رشحت جريدة “ليكيب” الفرنسية المنتخب الوطني المغربي للذهاب بعيدا فمسابقة كرة القدم فدورة الألعاب الاولمبية “باريس2024”، والتتويج بالميدالية الذهبية.

وكاتشوف الجريدة الفرنسية الشهيرة، ان 4 منتخبات تقدر توصل للفينال وتربح الميدالية الذهبية، وهي إسبانيا اللي لعبت فينال دورة طوكيو وخدات الفضية، والأرجنتين اللي باغيين يزيدو عدد الميدالية اللي عندهم بعدما سبق لهم وربحو 2 ذهبيات، والمنتخب المغربي اللي كايعتمد على جيل واعر من الشباب بحال بلال الخنوس وبنيامين بوشواري، وكاين منتخب المريكان حتى هو اللي مزيان.

وغتبدا منافسات كرة القدم فأولمبياد باريس 2024، يوم الاربعاء المقبل 24 يوليوز، وغايلعب المنتخب المغربي بقيادة المدرب طارق السكتيوي اول ماتش لهم فالمجموعات ضد الارجنتين فسانت اتيان، ومن بعدما غايلعب السبت 27 يوليوز فنفس المدينة ضد أوكرانيا فالجولة الثانية، وغايمشي يلعب الماتش الثالث فمدينة نيس ضد العراق يوم الثلاثاء 30 يوليوز.