كود سبور- مراكش//
كايعيشو المواطنين الجزائريين بحرية تامة ملي كايجيو للمغرب، وجمهور فريق قسنطينة الجزائري آخر من شهد على هذا الشي ملي جا الويكاند اللي فات لبركان باش يشجع الفريق ديالو ضد نهضة بركان برسم ذهاب دومي فينال كاس الكونفدرالية الافريقية.
الحرية اللي متعين الجزائريين بها الجزائريين ملي كايجيو للمغرب، كاتوصل لأنهم يقدرو يلقاو تونيات المنتخب الجزائري كاتباه كاتباع فالأسواق الجزائرية، ويشريوها بكل حرية، عكس الأسواء الجزائرية اللي فيها التجار كايخاو يعرضو التونيات المغربية للبيع حيث السلطات الجزائرية كايخلعهوهم.
وغير إلى درتي فالأسواق ديال مراكش مثلا وبالضبط فگليس وجامع الفنا، غاتلقى التونيات ديال المنتخب الجزائري معروضة فالمحلات وسط المدينة الحمرا للبيع، وهذا الشي اللي صوراتو كاميرات جورنال “گود”، وسولت واحد من التجار فمراكش اللي حاط تونيات المنتخب الجزائري للبيع، وقال بتلقائية فتصريح له: “حنا ماشي بحالهم، حنا كنبيعو التونيات ديالهم ومعلقينهم وخاصنا ما نكونوش بحالهم”.
الجمهور الجزائري ولى مدرك لحقيقة المشاكل اللي مفتعلينها السلطات الجزائرية، وفكل مرة كايجيو الجزائريين للمغرب سوا فشي ماتش او سياحة او عمل، كايتأكدو انهم مرحب بهم فالمغرب وان المغاربة ديما باب بلادهم مفتوح للجيران بشرط يحتارمو القوانين المغربية، عكس السلطات الجزائرية اللي ديما كاتقلب على المشاكل حتى مع المواطنين المغاربة ملي كايكونو عندها فبلادها.
