وكالات//

دايرين جوج ديال اليابانيين البوز فالسوشيال ميديا بعلاقة غرامية ماشي عادية، كاتجمع ما بين كوفو، شاب عندو 23 عام، وآيكو، مرا كبيرة فعمرها 83 عام، اللي هي الجدة ديال زميلتو فالقراية.

العلاقة ديالهم بدات من شي ست شهور، منين مشى كوفو لدار صاحبتو وتلاقى بآيكو وتعلق بيها من أول نظرة.

منين دارو واحد اللقاء مصور، ولاو معروفين بزاف فمواقع التواصل، وكان باين كوفو شاد ف إيد آيكو، اللي كانت مزوجة من قبل وعندها ولاد وحفدة، وعايشة دابا مع عائلة ولدها.

كوفو مازال كيقرا فجامعة وقريب يسالي، وكيدير ستاج فواحد الشركة ديال التصميم.

وقال كوفو باللي المشاعر ديالو تجاه آيكو كانت سريعة، وحتى هي بادلته نفس الإحساس، وقالت عليه أنه “ولد زوين وكيعطي طاقة ماعمرها شافتها فشي شاب”.

ورغم أنهم كانوا مترددين فالأول بسبب الفرق الكبير فالعمر، الرحلة اللي داروها لديزني لاند قلبات الموازين، حيث كوفو صرح ليها بالحب قدّام قلعة سندريلا مع الغروب، وآيكو وصفت داك اللحظة بالساحرة.”