كود أكادير//

سوس فرحانة هاد السيمانة. فريق أولمبيك الدشيرة دارها، وطلع رسمياً للقسم الأول من البطولة الاحترافية، بعد ما قلب الطاولة على شباب السوالم فماتش الباراج. رغم الخسارة فماتش الذهاب 2-1، الفريق السوسي رد بقوة فالإياب وربح بثلاثية نظيفة، وتأهل عن جدارة لقسم الصفوة.

أولمبيك الدشيرة كان محتل المركز الثالث فالقسم الثاني، ودار المفاجأة فالبلاي أوف، وبهاد الإنجاز كيصبح ثالث فريق سوسي يلعب فالقسم الأول، إلى جانب حسنية أكادير اللي غتلعب غداً ماتش حارق ضد رجاء بني ملال باش تحافظ على بلاصتها.

الفريق لي نزل هو شباب السوالم اللي ما قدرش يبقى بعد أربع سنين مع الكبار.

كاتب الدولة المكلف بالصناعة التقليدية لحسن السعدي بارك للفريق فواحد التدوينة، وحضر للماتش يشجع.

سبب حضور الوزير السعدي، حسب مصادر “گود”، ماشي غير حيث كيشجع الفريق بحماس، بل كذلك لأن ولدو كيعلب فهاد الفريق، الشي اللي كيزيد من ارتباطو الفريق، ويدفعو باش يكون سند قوي لأولمبيك الدشيرة فمشواره الجديد مع الكبار.

وماشي غير الدشيرة لي فرحات، سوس كاملة كتعيش موسم كروي استثنائي، حيث حتى أمل تزنيت ضمن الصعود للقسم الثاني، ومعروف ان هاد الفرقة دعمتها اطراف سياسية ومن رجال اعمال معروفين، خصوصا عائلة إدحلي، المعروفة بارتباطها بحزب الأحرار، بحيث زينة إدحلي، النائبة البرلمانية وعضو مكتب مجلس النواب، من الوجوه لي دعمت الفريق.

يعني اليوم، الأحرار دارو دعم كبير لجوج فرق طلعو من سوس: أولمبيك الدشيرة وأمل تزنيت.

وفهاد المشهد الرياضي كاينا السياسة، فمثلا البام عمدة مراكش ومنسقة الحزب وطنيا فاطمة الزهراء المنصوري ساندت الكوكب المراكشي بقوة، والفريق حقق الصعود للقسم الأول . نفس الشيء لزميلها فالقيادة الجماعية للبام محمد المهدي بنسعيد، وزير الثقافة، باطرون اتحاد يعقوب المنصور فالعاصمة الرباط للي حقق الصعود كذلك للقسم الاول.

الرياضة اليوم ولات جزء من التموقع السياسي، وكل حزب كيعول على فرق كروية لتحقيق المزيد من المكاسب السياسية والشعبية.

https://www.facebook.com/share/v/16AKvvzNMU/?mibextid=wwXIfr