كود ـ الجديدة//
مدينة الجديدة وضواحيها مازال كتعاني من جرائم “الفراقشية” اللي ولات كا تكرفس الفلاحين والكسابة.
ف ليلة السبت/ الأحد (26 و27 أكتوبر)، عاش دوار العيايشة بجماعة الحوزية على وقع جريمة بعدما تعرضت سيدة مسنّة كاتعيش بوحدها لسرقة جوج بگرات من زريبتها.
وحسب المعطيات اللي توصلات بيها (كود)، العصابة اقتحمت دار الضحية تحت جنح الظلام، وفكات القنانب ديال البهيمات وساقاتهوم بهدوء حتى الطموبيل اللي كانو مستعملينها. ولكن الحظ ما كانش معاهم بزاف، حيث خلاو وراهم معول يُحتمل استعملوه باش يهرسو القفولة، وزيد عليه الباب الخلفي ديال المركبة اللي بانت فيها آثار يمكن يستغلوها رجال الدرك فرفع البصمات والتعرف على هاد الفراقشية.
وفور ما توصلو الجدارمية ف أزمور بالخبر، بدات التحريات تحت إشراف النيابة العامة فالجديدة. المحققين كيركزو دابا على البصمات اللي بقات فالمعول والباب ديال الطوموبيل، وكيتبعو حتى مسار الطموبيل عبر كاميرات المراقبة، خصوصا اللي راكبة قدّام واحد الفندق قريب من الطريق.
السكان ديال المنطقة طالبو السلطات الأمنية تزيد المراقبة الليلية وتشدد الإجراءات، حيث هاد النوع ديال الجرائم ولى كيرعب الفلاحين اللي كيعتمدوا على الماشية كمصدر رزقهم الوحيد.
