كود سبور//

عبر الخبير التحكيمي اسماعيل الفتح المتخصص فتطوير التحكم فكرة القدم عالميا، على الفرحة ديالو حيث رجع للمغرب باش يخدم ويساهم فتطوير التحكيم المغربي، بعدما خدم كحكم فالمريكان ودوليا، واكد انه منخرط فالمشروع اللي طلق فوزي لقجع رئيس الجامعة الملكية المغربية لكرة القدم لتطوير منظومة التحكيم المغربي ابتداء من الموسم الجاي.

وهضر إسماعيل الفتح فتصريح للموقع الرسمي للجامعة الملكية المغربية لكرة القدم، وقال: “كانشكر فوزي لقجع رئيس الجامعة الملكية المغربية لكرة القدم على هذه الدعوة، وشرف كبير ان بلادي تعيط ليا باش نخدم مع المنظومة الرياضية هنا”.

ووضح اسماعيل الفتح: “المشروع هو ديال تبادل الخبرات وتقييم منظومة التحكيم فالمغرب عامة، برؤية جديدة ديالي أنا اللي عشت فيها فمنظومة التحكيم الاحترافي اللي عندنا فالميريكان كثر من 12 عام، وكذلك التجربة ديالي الدولية كمستشار ديال تطوير التحكيم فكثير من الجامعات الاولى بيا هي البلاد ديالي”.

وكمل الخبير التحكيمي المغربي-الميريكاني، وزاد شرح بخصوص المشروع: “غايكون تقييم التحكيم بمشاركة مع رضوان جيد وبوشعيب لحرش، وتبادل الاراء وتخرجو بواحد التقرير وناقشوه كيفما قال الرئيس فوزي لقجع، ونشوف اللي غايخدم فيه والتعديل اللي غايكون وناخدوه كاخطوة مستقبلية للموسم الجاي باش نزيدو بالتحكيم ديالنا محليا وحتى دوليا، حيث الحكم المغربي يستاهل وعندو الطاقة باش يكون من احسن الحكام فالعالم ويلعب ماتشات عالميين”.