أنس العمري -كود///

المعطيات الدقيقة الواردة من مصادر القرار التنظيمي، تؤكد أن “الكاف” فرض بروتوكولا صارم بخصوص مباريات “الكان” المقامة بالمغرب.

التعليمات الموجهة لرجال الأمن الخاص والمنظمين جاءت مشددة: “التذكرة الإلكترونية” هي جواز السفر الوحيد لعبور البوابات.

وهاد التوجه الهدف منو قطع الطريق على أي اجتهادات شخصية، داحضا بذلك كل الشائعات التي تروج لإمكانية تكرار سيناريوهات الدخول المجاني في اللحظات الأخيرة.

وأثير هاد السيناريو على نطاق واسع بعد ماتشات الجولة الثانية من المسابقة القارية.

وبرز فالمشهد جمهور أكادير اللي خلق الحدث فهاد الكان، بعدما حج، البارح الجمعة، أكثر من 40 ألف متفرج لملعب “أدرار” لتشجيع المنتخب المصري فالماتش اللي جمعه بنظيره الجنوب إفريقي.

الحضور شجع بحماس قوي، وهادشي بين شغفو الكبير بالكرة. ونتيجة لهاد التفاعل الرائع فالمدرجات، قدم الاتحاد المصري لكرة القدم شكره وتقديره للجماهير المغربية على الدعم اللي وفرّته لجميع مباريات المنتخب المصري بملعب أكادير ضمن منافسات كأس أمم إفريقيا المغرب 2025.

كما ثمن الاتحاد المصري هاد الدعم، اللي أكد أنه كيعبر على عمق العلاقات الأخوية والتاريخية بين الشعبين المغربي والمصري، وكيبين على الروح الرياضية الرفيعة والتلاحم العربي داخل الملاعب الإفريقية.

لكن وراء هاد الصورة الزوينة، وقعات بعض الأحداث اللي خلقت بزاف ديال الهضرة والتأويلات.

هاد الأحداث ارتبطت بالتصرفات الفوضوية والسلوك غير المسؤول اللي صدر من طرف البعض، واللي ما كيمثل لا جمهور سوس ولا الصورة اللي باغي المغرب يبان بها، وكيضر بزاف بصورة بلادنا.

محاولة بعض المشجعين اللي ما عندهمش تذاكر لاقتحام الخطوط الأمنية والحواجز الحديدية، وسلك طرق جانبية وتسلق الأسوار للولوج للملعب، سبب ضرر كبير على التنظيم وسلامة الجماهير.

اللي خاص بزاف ديال الجماهير تنتبه ليه هو أن بحال هاد الأحداث، خصوصا فالتظاهرات القارية، ممكن تكون عندها انعكاسات سلبية، خاصة وأن المغرب واجد راسو لاحتضان تظاهرات كبرى، وعلى رأسها مونديال 2030، واللي أكادير داخلة فيه كمدينة مرشحة.

وفهاد السياق، فاعلين فالمجال الرياضي ذكرو بأن قوانين الاتحاد الإفريقي لكرة القدم صارمة بزاف فيما يخص أحداث الفوضى، سواء داخل الملاعب أو حتى فمحيطها، وكتسمح بفرض عقوبات تنظيمية وتأديبية ممكن تمس المدن المستضيفة، الشي اللي يقدر يأثر على تقييم الجاهزية الأمنية والتنظيمية ديال أكادير فاستضافة مباريات كبيرة.

وبخصوص الهضرة اللي كتروج على “المجانية” ديال الولوج للملعب، مصادر من داخل اللجنة المنظمة للكان كانت واضحة فهاد الشأن، وأكدات أنه ما كاين حتى شي ولوج بالمجان لملعب أدرار ابتداء من المقابلات الجاية، وأن الدخول غادي يكون غير عبر تذاكر قانونية، وفق القوانين المعمول بها فالمسابقة.

اللجنة المنظمة، فالمقابل، عبرت على الشكر ديالها لساكنة أكادير على المساهمة الكبيرة فنجاح البطولة والتنظيم المحكم، اللي خلّى انطباع إيجابي عند الجماهير الإفريقية.

ومن جهة أخرى، علمت “كود” أن الهضرة اللي كيتروج فبعض المنصات على نقل جماعي بالمجان للملاعب مجرد إشاعات وهضرة خاوية ما عندها حتى أساس من الصحة.

دابا، واضح أن الكان مافيهش التساهل، وتنظيمو غادي وفق قوانين صارمة. المجانية ما داخلاش فالمعادلة، وأي ترويج لعكس ذلك غير كيخلق البلبلة وكيضر بصورة المدينة والبلاد، فواحد الوقت اللي خاص فيه الجميع يتحمل المسؤولية ويكون فمستوى الحدث.