كود سبور//

بدا المنتخب الوطني المغربي الاولمبي مزيان أولمبياد باريس2024، برباح مثير على الأرجنتين بطل الألعاب الاولمبية 2 مرات، فماتش مثير بنتيجة 2 لواحد اليوم الاربعاء فمدينة سانت اتيان.

وملي تقرر استئناف ماتش المنتخب الوطني المغربي والأرجنتيني برسم الجولة الاولى من أولمبياد باريس2024، لمدة 3 دقائق وبلا جمهور، بعدما توقفت مباشرة ملي ماركاو الأرجنتين هدف التعادل حيث نزلو شي مشجعين للتيران عند اللاعبين.

وتم استئناف الماتش من طرف الحكم السويدي نيوبرگ اللي كان مثير للجدل بالقرارات ديالو المنحازة للارجنتين، وملي علن على استئناف الماتش لمدة 3 دقائق كجزئ من 15 دقيقة اللي زاد مؤقت بدل الضائع، مشى رجع لشاشة الـvar للتأكد من صحة الهدف الثاني للارجنتين، وقرر إلغاء الهدف بداعي التسلل على مسجل الهدف كريستيان ميدينا.

وكان الشوط الأول بين المغرب والأرجنتين سالا بنتيجة واحد لزيرو لمصاحة الاسود، وبهدف قاتل ماركاه سفيان رحيمي فاللحظات الأخيرة من الجولة الاولى، بعد تمريرة حاسمة من بلال الخنوس اللي عطاه اليأس اخوماش باس بطالون واعر، وهو عطى اسيست لولد يوعري اللي عرف كيفاش يتبلاها ويضرب الكورة للشبكة ديال الأرجنتين.

وفالشوط الثاني قدر إلياس أخوماش يجيب ضربة جزاء بعدما دفعو واحد من لاعبين الأرجنتين وطاح، وتكلف سفيان رحيمي بتنفيذ البينالتي وماركا منو الهدف الثاني الثاني للمنتخب المغربي فالدقيقة فالدقيقة 51، ومن وراها قدر المنتخب الارجنتيني يماركيو الهدف الاول بواسط جوليانو سيميسيوني اللي استغل سوء تغطية فدفاع ليكيب ناسيونال فالدقيقة 68،

وكان الحكم ديال الماتش متساهل بزاف من منتخب الأرجنتين واللاعبين ديالو اللي كانت تدخلاتهم خشنة بزاف فحق لاعبين المنتخب المغربي، وحتى المدرب ديالهم خافيين ماسكيرانو زاد فالاحتجاج بلا قياس وما عطاهش إنذار، والأكثر من هذا الشي الحكم زاد 15 دقيقة فالشوط الثاني، واخا ما كانوش توقفات كثيرة فهاد اللقاء، وقدرو الأرجنتين يماركيو الهدف الثاني ديال التعادل وهو يتحبس اللعب حيث شي مشجعين هبطو للتيران، وبقات المباراة موقفة لأكثر من ساعة وملي تم استئنافها مشى الحكم للفار وقام بإلغاء الهدف الثاني ديال ااارجنتين بداعي التسلل، ومن وراها سالا الماتش بنتيجة 2 لواحد.

وبهذا الرباح خدا المنتخب الوطني المغربي 3 نقاط تصدر بها الگروب الثاني من أولمبياد باريس2024، والأرجنتين عندها 0 بوان، في انتظار نتيجة ماتش أوكرانيا والعراق عن نفس المجموعة، مع العلم ان المغرب غايلعب الماتش الثاني السبت الجاي ضد أوكرانيا.