كود – وكالات //
طلع ثمن الغاز فأوروبا اليوم بـ35٪ من بعد الهجمات اللي تضربات بها منشآت الطاقة فالشرق الأوسط، خصوصاً هجوم من إيران على أكبر موقع فالعالم لإنتاج الغاز الطبيعي المسال فـقطر.
ومع بداية التداول اليوم الخميس مع 8 دالصباح بتوقيت فرنسا، طلع الثمن ديال الغاز فالسوق الهولندية TTF، اللي كيتعتابر المرجع الرئيسي فأوروبا، بـ28,06٪ ووصل تقريباً لـ70 أورو للميغاواط فالساعة، ؤطلع حتى لـ 35٪ فواحد اللحظة.
الشركة العمومية للطاقة فـقطر قالت باللي المجمع الغازي ديال راس لفان تضرر بزاف من بعد هجمات جديدة بالصواريخ مع الفجر على هاد الموقع المهم، الشي اللي زاد خوف الأسواق من اضطراب فإمدادات الطاقة فالعالم.
وفنفس السياق، علن الهلال الأحمر الفلسطيني باللي 3 العيالات فلسطينيات ماتوا فهجوم صاروخي إيراني ضرب الضفة الغربية فـوقت معطل من العشية الاربعا، وكيعتابر هاد الهجوم أول ضربة إيرانية كتوقع فهاد المنطقة.
وفتطور آخر اليوم الخميس علنات وزارة الدفاع السعودية بلي درون ضربات مصفاة سمرف فمدينة ينبع على البحر الأحمر، أما جارتها الكويت قالت بلي مصفاة ميناء عبد الله التابعة لشركة البترول الوطنية الكويتية تعرضات لهجوم حتى هي بدرون اليوم، هاد الهجمات على منشآت النفط والغاز فدول الخليج كيأثر بشكل كبير أسواق الطاقة العالمية.