كود – كازا //

بمناسبة للعيد الكبير 1447 (2026)، اللي عرف حركة كبيرة ديال التنقل بين مختلف جهات المملكة، فعّل المكتب الوطني للسكك الحديدية برنامج خاص للنقل ما بين 20 ماي و7 يونيو، باش يواكب الإقبال الكبير ديال المسافرين ويضمن ليهم السفر فظروف مريحة، آمنة ومنظمة.

وفهاد الوقت من 20 ماي حتى لـ1 يونيو 2026، نجح هاد البرنامج الخاص فتنقل جوج مليون مسافر، ومن بين هاد العدد، سافر كثر من 935 ألف فوايجور مع  ترانات الأطلس، وكثر من 221 ألف مسافر استعملو ترانات البراق، كيف ما  تنقل 795 ألف مسافر مع الترانان المكوكية السريعة.

وباش يستاجب لهاد الطلب الكبير، وفر المكتب كتر  من مليون و300 ألف بلاصة، وبرمج كثر من 2535 رحلة فهاد الوقيتة ،وسمح هاد المجهود بالحفاظ على نيفو مزيان ديال الخدمة، حيث وصلات نسبة انتظام القطارات لـ82 فالمية، كيف ما تسجلات ترانات البراق نسبة مهمة وصلات 98,53 فالمية.

اما نهار الاثنين 25 ماي تسجلات أعلى نسبة ديال التنقل، بعدما تنقل كثر من 200 ألف مسافر فنهار واحد .