سهام البارودي – كود//

واحد الفيديو بان مؤخرا ديال واحد كايتحرّش بواحد البنت فالطوبيس و كايتهدد عليها، و كايعنّفها لفظيا و كون ماكانوش الناس كون غالبا ضربها و يمكن حتى يحيد ليها سروالها و يغتاصبها !
لقد بلغ الحقد المنوي الزبى ! المغرب بلد غير آمن للعيالات و خصوصا الفضاءات العامة، زنقة، غابة، جردة، تران، طوبيس، كلشي حاضيك كلشي كايحك فحجرو فاش كادوزي حداه، كلشي كايتستس عليك، و كاين گاع لي يقدر يشدك من يديك باش تعطيه النمرة و طبعا مورا “لاّ” غاتبداي تسمعي السبان بالاشكال و الانواع و كون كنتي غا زوينة و سيري يا الزرگة و منكم “عاداد” و المعيورة العابرة للازمنة و الامكنة ” وا سيري يا الق*بة”!
عرفتي دوك الوصايا العشر، وا راه كاين فحالهم للعيالات فالمغرب، مايمكنش تخرجي بالليل و مايمكنش تعومي بالمايو فالبحر و مايمكنش تمشي تجري فالغابة ومايمكنش تمشي تجلسي فشي جردة بوحدك، مايمكنش تلبسي لي بغيتي و تمشي تقداي فشي سويقة و مايمكنش تجلسي فبزّاف د القهاوي لي محتاكرهم بو-خصية و مايمكنش تشري اولوايز من الحانوت بلا مايديرها ليك فالجورنال فحالا شارية طريفة د الحشيش و مايمكنش و مايمكنش و مايمكنش …
العيالات كايعيشو حياة الماعز فالمغرب، خاصك تخرجي للزنقة و تخلي بزازلك و ترمتك فالدّار باش مايتحككوش ليك عليها فالطوبيس و مايعايروكش بيها فالزنقة ! حيت الاغلبية كايشوفوك تقبة، اما لاكنتي لابسة شوية مأنتكة فا راه الاغلبية كايصحابهم كاتقلبي على لي “يكون بيك” هادي هي الفكرة لي مكسلة فدماغ بزاف د الناس.
داكشي علاش الاف المغربيات كايخرجو من المغرب كل عام، راه تمشي تعيشي فالسينيغال و لا فالفيتنام و غاتلقاي الاحترام و الامان لي ماعندكش فبلادك، بلا مانهضرو على اوروبا و ميريكان، بزاف ديال المغربيات كايهاجرو غا باش يعيشو طرونكيل مايتحرش بيهم حد مايديرونجيهم حد، يعيشو كناس عاديين فحالي عايشين العيالات فبزاف د البلدان.