كود -وكالات//

فإنجاز علمي كبير، قدرو العلماء يرسمو أدق خريطة ثلاثية الأبعاد للكون حتى لدابا، ويبينو فيها كثر من 47 مليون مجرة، هاد المشروع جا بعد خدمة دامت 5 سنين، واعتمدات على جهاز متطور سميتو  DESI (Dark Energy Spectroscopic Instrument)، اللي فيه 5000 عدسة كيرصدو الضوء ديال النجوم والمجرات.

هاد المسح ماشي غير عطانا أرقام كبيرة، ولكن حتى ورّى باللي الكون ممكن يكون فيه ملايين ولا حتى مليارات الكواكب اللي يقدرو يكونو بحال الأرض، العلماء حللو الضوء ديال هاد المجرات باش يعرفو فين كاينين، مع السرعة ديالهم، وحتى التركيبة الكيميائية ديالهم.

لي كيدهشر هو أن الضوء اللي جا من أبعد المجرات عندو أكثر من 11 مليار عام، يعني كيرجع لبداية تكوين الكون تقريباً، وزيد عليها هاد المشروع كيركز حتى على فهم واحد اللغز كبير سميتو الطاقة المظلمة، اللي كتشكل تقريباً 70% من الكون وكتأثر فالتوسع ديالو.

النتائج الأولية كتشير أن هاد الطاقة ماشي ثابتة كيفما كانو كايعتاقدو قبل، ولكن ممكن كتتغير مع الوقت، وهاد الشي يقدر يبدل بزاف ديال المفاهيم اللي معروفة فـعلم الكونيات.

العلماء دابا خدامين على تحليل المعطيات كاملة، ومن المتوقع يخرجو بنتائج جديدة ومهمة فـ 2027، اللي ممكن تقلب الفهم ديالنا للكون كامل.