سيهام البارودي ـ كود//

المطارات ديال المغرب عامرين بالمعتمرين هاد الأيام، الناس لي غادين يديرو عمرة رمضان، الناس ديال الأمن والديوانا والطيران عينيهم غايخرجو من بلاصتهم، بقوة الهضرة والتعليمات، إيه ضيوف الرحمن على الراس والعين ولكن واش عرفتي شنو هي تستقبل وفود ديال الناس كل نهار، متوسط العمر ديالهم هوا ستين عام، الأغلبية ماقارينش وماعمرهم شدو الطيارة ومراض وماعارفينش المطار والباگاج وأول مرة غايصايبو الباسبور؟ راه بلحوحتك تخرج من بلاصتها ولي كذبني يسول الناس لي خدامين فالمطار على المعاناة لي كايعانيو فهاد الفترة.

وأنا فالمطار ديك النهار، سهيت فالمعتمرين وخصوصا العيالات، كانشوف كيفاش المرأة المغربية كاتسالي حياتها، الأغلبية الساحقة عندهم زيادة فالوزن ولا سمنة مفرطة مخبعة وسط الجلابة والقميص الابيض، الأغلبية الساحقة كاتبان عليهم من وجهم حياة الميزيريا لي دوزو والسنوات لي دازت حدا الكوكوط فالكوزينا وقلة الشي والفقصة د الراجل وعائلة الراجل والاولاد، الوجوه شاحبة والصحة قليلة والاسنان مشاو وجا فبلاصتهم فم…

بزاف ديال الدراري كايبغيو يديو الرضى كاينوض يسيفط مو عمرة، السيدة كاتكون ماعمرها فاتت البلاكة ديال الربعين حتى كاتلقى راسها وسط المطار معلقة بادج ولابسة كاسكيطة فوق الزيف ديال شي أجونص “ميلود ترافلز” و لا “العوني تور”، عرگانة وعيانة وهالكها السكر والطونسيو والسمنة المفرطة، وجارّة سبرديلة بيضة غالبا أول مرة غاتلبسها وتابعة المسؤول على لاجونص باش ماتلفش تصدق كانت غادة للسعودية تاتولي شادة الطيارة ديال دجيبوتي، كاتوصل للسعودية كاتلقى راسها فشي غرفة سداسية فشي أوطيل بعيد بعشرة كيلوميتر على الحرم، خاصها طاكسي وطوبيس باش تصلي الفجر فالحرم وسط بلاد ماشي بلادها وناس ماشي ناسها فتجربة غريبة عجيبة وماتقدرش تقوليك راه تكرفصت ولا راه تمرمدت ولا شنو هاد الجايحة لي جيت ليها!؟ غايصحابها لا تشكّات غادّي الذنوب.

إيه بزاف ديال الناس كايرجعو فرحانين وكايقوليك “عجبنا داك المقام” ولكن واش يقدرو يقولو العكس؟ شحال من واحد مشا تكرفص تما وارجع؟ شحال من واحد فاتوه الشعائر ومشا عليه الكار؟ شحال من وحدة دابزات مع صحاباتها لي معاها فالشومبر على الطياب؟ شحال ديال التحرش والعنف كايتعرضو ليه الناس تما وماكايقدروش يعاودو عليه؟ وشحال من واحد ماكرهش يبقى غا فدارو مرتاح واكل شارب ناعس مزيان والا يكتاب عليه ينعس مع ستة د النفوس فبيت واحد كايحزقو عليه ولكن حشم ومشى.

الحج والعمرة كايبغيو بنادم يكون بصحتو وفكامل قواه العقلية، شحال من واحد باه احمق وسيفطو تما بقا كايتخاصم ويدّابز مع المرشد ولاجونص والمعتمرين، وخاصو طبعا حتى الفلوس حيت باش تعيش تجربة روحانية سليمة وتخشع ودير المناسك خاصك تكون فغرفة خاصّة بيك فأوطيل قريب للحرم ماشي ناعس مع ستة د الناس كايمصو ليك الأوكسيجين.