كود كازا ///

خاص القوانين تتبدل فالهاكا. اللي كيرتاكب مخالفات كثيرة خاص يتمنع عليه لونتين او تتعاقب الاذاعة ويتسحب منها الترخيص. طبعا خاص هاد المخالفات توصل لعدد معين ولخطورة معينة يحددها القانون. الهاكا صدرات عقوبات ضد هاد الاذاعة الرياضية بسباب العماري.

هاد النهار حط حزب التجمع الوطني للاحرار شكاية عند الهاكا بسباب ما سماه “تصريحات صادرة عن منشط برنامج إذاعي رياضي”. قالت الشكاية بلا ما تسمي العماري باللي الاثنين 14 شتنبر 2026 هدر على الحزب وذلك “خلال الفترة الانتخابية المؤطرة بمقتضيات خاصة تضمن تعددية التعبير السياسي ونزاهة الممارسة الإعلامية في خدمات الاتصال السمعي البصري”. العبارة اللي استاند عليها الحزب هي باش قال المنشط باللي بغى يضرب بالحجر

واكد الحزب باللي تصريحاتو تجاوزات النقد والتعليق الاعلامي وضمنات “إيحاءات بالتهديد والعنف لا تنسجم مع قواعد الممارسة المهنية والمسؤولية المفروضة على وسائل الاتصال السمعي البصري، خاصة خلال فترة انتخابية تقتضي قدراً أكبر من الحياد والنزاهة والمسؤولية”.

هاد الشي ما قالوش ضيف او شي حد اخر، تضيف الشكاية، بل المنشط ديال البرنامج واعتبرو الحزب “استغلال الموقع الإعلامي للتعبير عن مواقف متحيزة تجاه فاعل سياسي، وإقحام خطاب سياسي ذي طبيعة هجومية في فضاء برامجي غير سياسي”.

المنشط كان دخل راسو وسط نقاش سياسي رياضي. فوزي لقجع كعضو للمكنب السياسي للبام دار تصريح قدام مواطنين ببوزنيقة اللي تابعة ليها بن سليمان وفيها قال باللي الملعب ديال الحسن الثاني غيتنظم فيه الفينال ديال مونديال 2030 ورد عليه اخنوش من بعد فلقاء حزبي. كنعرفو المنافسة لكبيرة اليوم بين التجمع والبام. المنشط اللي خدام فإذاعة غالبية اسهمها ديال التجمعية مباركة بوعيدة، سب الحزب ورئيسو. دار مشكلة مع الهاكا ومشكلة لرئيسة جهة كليميم