كود سعيد الشاوي كازا ////

دابا دازت ايام على العمارة من 5 ايطاج اللي طاحت قرب عمالة انفا بشارع مولاي يوسف فكازا ولحد الان ما خرج حتى بيان من الداخلية فيه اعتقال القايد او لمقدم او شي حد فالسلطات. كيفاش هادو حاضيين الشادة والفادة وهاد المراقبة كتضاعف باش يكون رئيس الدولة فكازا. دابا هادي مدة وسيدنا هنا ومع ذلك السلطات ما دارتش خدمتها. اش هاد العبث.

حسب ما علمته “كود” هادوك اللي دارو الاصلاحات وضربو الساس ما عندهمش رخصة. ولكن واش العائلات اللي ساكنة فهاديك العمارة من 5 ايطاج واش ما بلغاتش السلطات؟

حسب مصدر “كود” فكاينة عائلات عيطات اكثر من مرة للقايد وللمقدم. مصدر ل”كود” من كازا اكد باللي ما كاينة حتى شي شكاية مكتوبة وبللي ايلي دارتها شفوية راه ما مقبولاش. لكن مصدر اخر ل”كود” استغرب لهاد التبرير. وقال باللي خاص التحقيق اللي كيشرف عليه الوكيل العام يسمح للقايد وللمقدم ويشوف تلفونو واش كان شي اتصال مع سكان هاد العمارة ولا اللا.

هادوك اللي كانو يسدو عليهم الباب ويديرو الاصلاحات بلا رخص يستحيل ما يعرفهم القايد واللي معاه. وراه هاد الشي وقع حدا العامل. 
اهانة لكل بيضاوي ما يقرقبوش على رجال السلطة ولكبار فهاد لقضية