كود -وكالات//

العلماء لقاو بأن “G-spot” عند الرجال ماشي فالبلاصة اللي كانو كيعتقدوها الناس من قبل ،حيت فاش كانو كيهضرو على المتعة الجنسية عند الراجل، كانو بزاف كيظنو باللي البروستاتا هي أهم منطقة،ولكن دراسة جديدة من إسبانيا بينات العكس، مني لقاو باللي كاينة منطقة صغيرة تحت القضيب، سميتها “دلتا اللجام Frenular Delta ”، وهي اللي عامرة بزاف بالنهايات العصبية اللي كتعطي إحساس قوي بالمتعة.

هاد المنطقة كتكون على شكل V ولا Y، فالبلاصة اللي كيتلاقاو فيها الجلد ديال القضيب مع الراس ديالو (الحشفة)،الباحثين دارو دراسة دقيقة بزاف، شافو فيها أنسجة ديال الأجنة ورجال بالغين، واستعملو تقنيات جديدة باش يشوفو الأعصاب بالتفصيل ،النتيجة كانت هي ان هاد “دلتا اللجام” فيها كثافة كبيرة ديال الأعصاب كثر من أي منطقة خرى، و حتى كثر من راس القضيب اللي كانو كيعتابروه المصدر الرئيسي لمحاسيس.

الباحثين  لقاو فبعض النقاط ان فيها  17 مستقبل ديال الإحساس مجموعين فبلاصة وحدة، وهاد الشي كيخليها “بؤرة” قوية ديال المتعة ،واحد الخبير قال باللي هادي من أكثر المناطق اللي كتستجيب للتحفيز الجنسي عند الرجال، واعتابر هاد الاكتشاف دليل علمي باللي هي فعلاً “نقطة جي” عند الذكور.