كود سبور//

ترفعت عقوبة التوقيف على المغربي مهدي بنعطية المدير رياضي لنادي اولمبيك مارسيليا الفرنسي، من طرف الاتحاد الفرنسي لكرة القدم.

وحسب شبكة RMC الفرنسية، فالاتحاد الفرنسي قرر رفع العقوبات عن مهدي بنعطية بشكل مؤقت في انتظار صدور القرار الأخير بالخصوص ديالو، بعدما تقدم نادي اولمبيك مارسيليا بإستئناف جديد لرفع  عقوبة التوفيق لمدة 3 اشهر الصادرة عليه من لجنة التأديب بالاتحاد الفرنسي، بعدما  ترفض الاستئناف اللي تقدم به مهدي بنعطية فهاد القضية.

وكانت لجنة الاستئناف بالاتحاد الفرنسي، أيدت العقوبة الصادرة من لجنة التأديب فالاتحاد على مهدي بنعطية، بالتوقيف ديالو لمدة 3 اشهر نافذة و 3 اشهر موقوفة التنفيذ بسبب السلوك اللي صدر منو فماتش أولمبيك مارسليا وليل يوم 14 يناير الماضي، ضمن منافسات دور الـ32 من كاس فرنسا، وكان حكم المباراة، طرد المهدي بنعطية خلال اللحظات الأخيرة من المباراة اللي سالا الوقت الأصلي ديالها بنتيجة التعادل الإيجابي 1-1، ومشاو الفريقين إلى ضربات الترجيح اللي عرفت تأهل ليل بعد الفوز على مارسليا بنتيجة 4-3.