كود كازا//

الناس فدار بوعزة مافاهمين والو، عبد الله العسولي اللي تضرب بالحبس النافذ في عهد شكري المعزول من رئاسة جماعة دار بوعزة، رجع بقوة للميدان، موظف متعدد المهام، الاختصاص تاعو خلق الرعب في المقاولين والناس اللي تايبنيو فيلات تاعهم ولا منازل، كيهدد ويخلع، الغرض الأول والأخير من هادشي هو المعني بالأمر يخضع.

دابا هاد الموظف اللي نورمالمون كان خاصو يكون خارج الجماعة بسبب ضبطه في القضية المعروفة تاع ابتزاز واحد مول شركة الأفرشة، حيث كان منعو من شي إصلاحات وطلب ليه رشوة، وملي مول الشركة عطاه 5000 درهم لاحها عليه، وطلب ليه أكثر، وقال ليه راه حنا جوج، وجرا عليه من البيرو، الشيء اللي خلا الضحية يمشي ويتاصل بالرقم الأخضر تاع النيابة العامة، في عهد السي عبد النباوي، ومن بعد تكلفات عناصر الدرك بكمين راقبات الموظف العسولي حتى شد الفلوس وهيا تهجم عليه وشداتو قيطي، هو شي نائب تاع شكري.

الموظف دخل الحبس وتحكم ابتدائيا واستئنافيا بالسجن، ولكن غير كمل العقوبة خرج وبقا تيتسنى حتى قادو ليه الضوصي، ورجعوه موظف،. دابا أش من محاربة فساد ولا رقم مباشر ولا حبس، دابا هادا اللي رجعو والسلطة المحلية اللي مدارتش خدمتها باش يشطبو عليه، كلشي متورط في إرجاع المفسدين للوظيفة تاعهم، يعني مكاين لا تخليق لا مولاي بيه، والأكثر من ذلك ترجعو لنفس المنصب وبقوة أكبر، هاجسه الانتقام، فعلا حيث تاشي حاجة مغادي تمنعو حتى إلى تشد ثاني غيكمل العقوبة ويرجع لبلاصتو.

كاع المواطنين تاع دار بوعزة ولاو عارفين هاد الشخص، والشر تاعو وكلشي ولا يدير ليه حساب كثر من الباشا ولا الرئيس الحالي اللي فدار غفلون، مكاين غير الابتزاز، واللي رفض يجرجرو مزيان ويندمو ويصيفط ليه بطايون تاع المخازنية والموظفين والسلطة وووو.

شكايات تحالت على رئاسة النيابة العامة والناس تيتسناو يتفتح بحث وتحقيق باش نعرفو شكون رجعو للوظيفة وخا دوز الحبس، وشكون تايحميه ومعامن تيقسم الغنيمة، حيث هادشي بزاف على واحد موظف بسيط.