كود – وكالات //

مازال السلطات المغربية والمريكانية كتقلب على جوج عساكرية من الجيش الأمريكي اللي غبرو فجنوب المغرب من بعد ما شاركو فمناورات عسكرية مع دول أخرى فلونتريما ديال ”أفريكوم“

وحسب معلومات خرجات من وزارة الدفاع الأمريكية الحادث ما وقعش فالتداريب، ولكن فواحد الخرجة داروها العسكر باش يتفرجو فالغروب،  فـ“رأس درعة” بإقليم طانطان.

التفاصيل كتشير بلّي واحد من العساكرية طاح فالما، وصاحبو نقز باش يعتقو، ولكن حتى هو لقى راسو فخطر بسبب الكورون ديال البحر لي كيجر ومن بعد تدخل عسكري ثالث ونقز عندهم ولكن ما قدرش يجبدهم، وهو يخرج غير بوحدو لابلاج.

فالأول، حاولو العسكر يديرو “سلسلة بشرية”  باش يخرجو العسكري اللي طاح، ولكن المحاولة ما نجحاتش، وهاد الشي زاد عقد الوضع.

ومن بعد الحادث، دارت السلطات عمليات بحث وإنقاذ كبيرة، فيها فرق برية وجوية وبحرية من المغرب وأمريكا، فيها طيارات وهليكوبتيرات عسكرية وسفن ديال البحرية الملكية، مع غواصين  ولكن مزال متلقاو لحد الان.