گود سبور//

كايعيش الوداد الرياضي ارتباك كبير بسبب العشوائية اللي كانت ومازال كاينة فالانتدابات واللي تسبب فيها الرئيس هشام ايت منا، والمدرب أمين بنهاشم ما بقى عارف ما يدير خصوصا وأنه ما مقتنعش ببزاف ديال اللاعبين اللي بان بلي مستواهم ماشي ديال الوداد.

وحسب مصادر “گود”، فأمين بنهاشم قرر تأخير استئناف اللاعبين للتداريب ما أمكن حتى يگلس مع هشام ايت منا، باش يحسم فلاليست ديال اللاعبين اللي غايمشيو بحالهم من الفريق الأحمر، واخا راه لاليست طويلة بزاف وخاص آيت منا يلقى معهم حلول باش ما يجروش الواك للنزاعات حيث المدرب ما قادرش يتدرب بهاد العدد الكبير من اللاعبين بلا رؤية واضحة لشكون غايبقى وشكون غايمشي.

الوداد دابا غارقين باللاعبين اللي ما صالحينش للفريق وخاصهم يمشيو بحالهم، والأولوية هي ايت منا يلقى معهم حلول للانفصال بالتراضي، فبلاصة ما يبقى غير جيب جيب فاللاعبين الجداد بلا إدارة تقنية ورياضية ويزيد يغرقها كيفما كايدير دابا غير باش يكالمي الجمهور ويبقى رئيس.

ودابا الوداد فيها 45 لاعب، واحل المدرب أمين بنهاشم كيفاش يدير معهم، حيث بزاف منهم خارج المفكرة ديالو، وهاد المصيبة عمرها كانت فالوداد الرياضي، ومضطر المدرب يقسم هاد اللاعبين لجوج گروبات بينما لقى حل مع ايت منا باش يصيفط اللاعبين اللي ما صالحينش للفريق.

ومتكون الگروب الأول د اللاعبين فالوداد من حركاس، بوطويل، موفي، مالصا، بنقطيب، محمدي، مترجي، مطيع. بوهرة، ناسي، ديران، ايت برايم، نسيك، الساخي، هباش، مرموق، غيلان، وقرر بنهاشم يخليهم حتى يوم 20 يوليوز عاد يبداو يترينيو.

والگروب الاخر مكون من بنعبيد، اقزداو، مفيد، بوشتة، بارت، فيريرا، الزمراوي، لعميرات، امرابط، الواسطي، فتيحي، هنوري، اونزو، الرايحي، اوبينگ، بيدرينو، مباريك، الجديدي، عزيز كي، لورش، ارتور، غيلوف، إبراهيم، سلمان، علالي، مواليمو، ماهتو، جعفري.

هذا الشي كامل كايبين للوضع الكارثي اللي كايعيشو الوداد الرياضي تحت رئاسة هشام ايت منا، واللي عمرو عاشو الفريق من قبل، بسبب التسيير العشوائي ديالو، وقوة السماسرية اللي كايتعامل مهم وغياب دور الإدارة التقنية، ودابا راه كل وكيل لاعب كايضغط باش اللاعب ديالو يبقى فالوداد واخا ما يكونش فمستوى النادي، وهذا الشي طلع لأعضاء المكتب المديري فالرأس وما بقاوش متقبلينو.