وكالات//
حبسات هيئة الإعلام والاتصالات فالعراق برنامج “ستوديو الجماهير” اللي كيدّيه الإعلامي الرياضي حيدر زكي فـ قناة “النهرين”، لمدة 15 يوم، حيت واحد الحلقة منو وقع فيها نقاش حاد بزاف بين الضيوف وتحوّل لعراك مباشر على الهواء، وكانت فيه هضرة خايبة وحركات ماشي هي هذيك.
وقالت الهيئة فواحد البلاغ رسمي أن هاد القرار جا حيث البرنامج خرق قوانين البث الإعلامي، وباللي المحتوى اللي تعرّض فداك الحلقة ما كيحترمش الذوق العام وكيشوّه صورة الإعلام الرياضي فالعراق. وحتّا قناة “النهرين” خداو فيها إنذار رسمي على داكشي اللي وقع فالحلقة اللي تعرّضات نهار 8 أكتوبر.
الحلقة اللي دارت البوز كان فيها صداع كبير بين المحلل الكروي ضياء حسين والنجم السابق رياض عبد العباس، وكل واحد فيهوم بدا كيتّهم الآخر بكلام قبيح، والمذيع حاول يهدي الموقف ولكن الأمور خرجات من يديه.
وحتى حسب ما قالت بزاف ديال المصادر المحلية، راه داك النقاش كان غادي يولي تضارب بالأيدي فالستوديو، الشي اللي خلا إدارة القناة تقطع البث ديال الحلقة بشكل مفاجئ، بعدما تزاد التوتر بزاف مباشرة على الهواء.
