گود سبور//

يتواصل مسلسل العبث داخل الأندية المغربية، وهذه المرة نهضة بركان اللي كايتضرب به المثل فالتسيير والتدبير الإداري، زلگو المسؤولين ديال التواصل فيه زلگة خايبة.

وناض مسؤول على صفحة نهضة بركان، نشر على الصفحة الرسمية ديال الفريق موعد ماتش النهضة ضد فريق اتحاد طنجة، برسم سدس عشر نهائي كأس العرش، فالوقت اللي الجامعة الملكية المغربية لكرة القدم والعصبة الوطنية لكرة القدم مازال گاعما حددو موعد إجراء ماتشات هذا الدور، قبل ما يتبين أن المسؤول على صفحة نهضة بركان نقال ونقل الخبر من شي صفحات على مواقع التواصل الاجتماعي ونشرو على الصفحة ديالو، فواقعة غريبة كاتبين مستوى فرق التواصل بعدد من الأندية اللي مفروض فيهم يكونو المصدر وهما اللي يعطيو المعلومة الصحيحة ويكذبّو الإشاعات.

نهضة بركان ومن ورا هذا الشي خرجو بلاغ اعترفو فيه بالغلط اللي دار هذا المسؤول على الصفحة ديال النادي، وقالو إنه اعتمد الخبر من بعض الصفحات، وأكدو أن التواريخ اللي نشرها الخاصة بالمباراة كانت خاطئة نتيجة تسرع هذا المسؤول على الصفحة.