فاطنة لويزا  ـ كود//

عطيت لراسي الحق نكتب اليوم على العام الجديد كيفاش كتبغيه كود، بلا منتشاور مع حد، وبلا خبار الشاف ديالنا نجيم.

كنعتبر راسي مروكية، ومروكية حارة، وكان عندي الزهر أن كود عطاتني مساحة نكتب لي بغيت.

هو في الحقيقة ماشي لي بغيت كلو، حيت كندير رقابة ذاتية.

وللأمانة رقابة ذاتية ماشي خوف من صحاب الحال، واخا الصراحة حتى هوما كيخلعو، وخاطروم كيضيق مرة مرة، والزغبي هو لي كيطيح فيهوم فاش كتكون البولة شاعلة.،،

الرقابة كاينة حتى من المجتمع، والمجتمع القارئ خصوصا، أما الناس الزوينة لي كتفيق فالصباح تضرب الكورفي باش تجيب التعادل في آخر النهار، بالتجربة أكثر تسامحا من بنادم لي قرا زوج حروفا، ونصب نفسو حاكم على أخلاق الناس وضمائر الناس.

المهم، نرجعو للبوناني، وصدق من قال: ميقوليش البوناني، هو البوناني.

أول ناس كنتفكرهوم فهاد راس العام، هوما خوتنا في الحوز لي مزال عايشين فالخيام، من بعد أكثر من عام على الزلزال.

وهادي حشومة تكون في بلد قريب غينظم كأس العالم.

نتمنى أنه قريب يتحل هاد المشكل بصفة نهائية، حيت نعاودها: عيييييب.

ونتمنى أن السي سعيد أيت مهدي منسق الحركة الاحتجاجية ديال متضرري زلزال الحوز، يفرجو عليه، حيت ماشي معقول هادشي، بغض النظر واش أخطأ في التعبير.

العامل لي رفع دعوى عليه، كان خاص يكون متفهم ان هاد الناس واصلة فيهوم للعظام.

في إسبانيا الناس لاحت الغيس وعايرت وفد رسمي فيه الملك ورئيس الوزراء فاش جاو لمنطقة الفيضانات، والملك قاليهوم: كنتفهم الغضب د الناس.

وهنايا، يجي رجل سلطة للأسف، ويقدم شكاية بمواطن غاضب.

بلادنا أكبر من هادشي، وأحيانا كيبان بحالا كتمشي بزوج سرعات.

يمكن خدمة كبيرة ديال الملك، أو شي مسؤول كبير في الدولة، يضربها مسؤول صغير بتصرف فيه انتصار للأنا على حساب صورة البلاد.

ولذلك نتمنى في 2025 يخرج ناصر الزفزافي وصحابو من الحبس، ويخرجو معتقلي الحوز وطاطا، وتسد كل الملفات لي كتشبه ليها.

نتمناو المسؤولين يديرو عين ميكة مرة مرة على الانتقادات القاسية تجاههم، واخا تكون فيها أشياء يمكن القانون كيجرمها، ويتعاملو بحسن نية، ويفهمو ان منصبهم عندو ضريبة.

أنا عزيزة عليا وهبي، فشي حاجات، بحالو دفاعو على الحريات الفردية وحقوق النساء.

ولكن في نفس الوقت، نتمنى وهبي ياخود بقولة: العفو عند المقدرة، ويسحب شكاياتو فمواجهة الصحافيين واليوتوبيرز،،

الرسالة وصلات أسي وهبي، ولي غلب يعف، وانت زعما مول العقل.

في 2025، كنتمنى الشتا تصب، واخا معندي أرض ولا بهايم ولا بحيرات.

ملي كتصب الشتا فهاد البلاد كلشي كينشط، والناس كترجع متسامحة بزااااف.

وعلى ذكر النشاط، في 2024 كانو الخوانجية ناشطين، في المظاهرات، وجا هاد الجولاني خلاهوم تزاد فيهوم نغزة.

وكيبانليهوم بلي شي ربيع عربي جاي، وهاد المرة معندومش مشكل يكون مسلح كاع.

أنا بعدا خلعوني، ملي باركو عمل مسلح فيه مقاتلين أجانب.

وطرحت على نفسي سؤال: إذا لا قدر الله، بغاو هادو لي حاكمين العالم حاليا، يخربقو الباراميتر في شمال إفريقيا، بحال لي طاري فالشرق الأوسط، واش الإخوان مغيديروش مدارو إخوانهوم فسوريا؟

في سكرة ونشوة الانتصار الإخواني في سوريا، صحاب العدالة والتنمية والعدل والإحسان، نساو كاع ديك شعارات الحوار والديموقراطية والتسامح والتنسيق مع اليسار فيما يفيد البلد.

اليوم كيكتبو بلي اليساريين كاعيين حيت الشريعة غتطبق فسوريا.

أويلي، الخوت باقين كيحلمو بالخلافة.

وكيكتبو: واش كيهمكوم غير الشراب والشعر مطلوق والبيران.

إيه، كيهمونا، كيما كتهمنا الخدمة والعيش الكريم.

علاه، علاش الواحد غيخدم إدا ما غيستمتعش.

كيهمنا أن كل واحد يدير لي بغا مادام ما كيتعدا على حرية أي أحد.

كيهمنا أنه يبقى الجامع وليلة الميلود والعيد الكبير والتراويح.

ويبقاو الشيخات والشطيح والنشاط كذلك.