كود ـ الرباط//

لا حديث داخل وزارة التربية الوطنية، إلا أن عن ترتيبات فتح منصب مدير أكاديمية جهة الرباط للتباري. الكاتب العام كان خرج إعلان المباراة وبلا ميتشاور مع الوزير غير الشروط ديال الترشح فواحد الجزئية هي اللي منوضة الصداع.

كيفاش الكاتب العام هبط شروط الترشح من 5 سنين لرؤساء أقسام لـ3 سنين، وشكون المستفيد.

رد الفعل اللي صرفاتو واحد النقابة عبر أسئلة موجهة للوزير من طرف عدة نواب، فيق مستشاري بنموسى لمناورة الكاتب العام.

موازين القوى فالوزارة الآن فيها جوج أقطاب، قطب مستشاري وزير التربية الوطنية اللي كيحسو براسهم غير مرغوب فيهم، وكيتعرضوا لحملات تشويه واستهداف من طرف صقور الوزارة، وكاين اللي بغى يلصق فيه تداعيات النظام الأساسي، حيث بنموسى منذ تعيينه همش إلى حد كبير كبار مسؤولي الوزارة، وكيشتغل مع طاقم مستشاريه، اللي أغلبهم خريجي معاهد وجامعات كبيرة، وعندهم دبلومات مزيانة، ودوزوا مناصب مهمة بأجور كبيرة.

القطب الثاني فيه الكاتب اللي تفرضوا عليه بزاف ديال المعارك ملي جا الوزارة المعركة الأولى هيا ينقي محيطو من أتباع الكاتب العام السابق اللي كانوا قوة فالكواليس، والمعركة الثانية، هي يدير فريق عمل ديالو فالوزارة وفخارج الوزارة، أي دير لكليكة اللي كتآمن بالولاء ووحدة المصالح.

أكاديمية الرباط أول اختبار لمعركة الكاتب العام خارج الوزارة، داكشي علاش لقى راسو مجبر يغير شروط الترشح لمنصب مهم، باش يدير رئيس قسم الشؤون الإدارية و المالية مدير أكاديمية العاصمة.

علاش الكاتب كيستثمر فربيع قصاري رئيس قسم الشؤون الإدارية و المالية بالضبط، ودايرها معركة حياة أو موت؟ هاذيك قضية أخرى يمكن ترجع ليها كود.

بالنسبة لبنموسى كاين نقاش الكفاءة والاستحقاق وباغي بروفايلات جداد، داكشي علاش غادي نلاقاو حتا مدير أكاديمية من المخضرمين مدفع واخا كاين شي بروفايلات نجحوا نسبيا.

هنا يمكن كتبان فكرة علاش بنموسى ميدفعش بشي مرشح من فريق مستشاريه، يتحملوا مسؤولية هاذيك البرامج اللي كيروجوا ليها ويبينو حنة يديهم ومنها بنموسى يفتح الباب لمسؤولين من خارج قبيلة الطباشير.

معروف دابا فأوساط التعليم أن بنموسى يراهن على مدارس الريادة باش يسرع وتيرة ديال تحقيق هدف الجودة، وهنا من المفروض أن مسار التنزيل خاصو يدار بشي تجربة نموذجية، علاش متكونش أكاديمية الرباط.

بين هدف بنموسى أنه ينجح تنزيل المشاريع ديالو، وبين طموح فريق مستشاريه اللي كيبقى مشروع، وبين حسابات الكاتب العام، عملية خلافة محمد أضرضور غالبا غادة دار بشي عملية قيصرية معقدة لأسباب كثير منها، أن تعيين مدير أكاديمية بغض النظر عن امتيازات المنصب، كيبقى واحد مجال ديال تقاطع  المصالح المالية كبير فالصفقات وصرف ميزانية كبر من ميزانية جهة الرباط، واللي كتفوت 120 مليار سنويا، هنا كيبانو اللوبيات الصحيحة اللي تقدر تفرض مدير أكاديمية مفصل ليه المنصب على المقاس، وهذا هو مربط الفرس، حيث تخفيض شرط الترشح لـ3 سنوات، فضح الكاتب العام اللي يمكن يصطدم بمستشاري الوزير وحتا الوزير إذا بان ليه المرشح ديالو خارج الحسابات، وهنا يمكن تفضح شي ممارسات انتعشات فالوقت القصير اللي توطدت علاقة الكاتب برئيس قسم الشؤون الإدارية والمالية اللي باغيه الكاتب العام، واللي هو اللي شاد بزبوز الفلوس.

لوبي الظل هو الأنشط فهاذ معركة مدير أكاديمية الرباط، كاين هضرة على أن بايتاس حتا هو طرف من لبعيد، وعطى كلمة أنه يدفع بتعيين رئيس قسم الشؤون الإدارية على مستوى رئاسة الحكومة، خصوصا أن بايتاس سبق ليه جاب كاتب عام لوزارتو معندوش الشروط، وكاين واحد الصفقة أنه يحيد ليهم العراقيل القانونية والسياسية اللي ممكن أنها تعيق مخطط لوبي الظل، خصوصا أن التعيين غيدوز فالمجلس الحكومي.

من هنا حتا لـ5 غشت2024، غادي تبان التوجهات الحقيقية، وغتبان حتى موازين القوى الحقيقية بين اشنو باغي الوزير، و اشنو باغين المستشارين ديالو، واشنو باغي الكاتب العام، وشكون اللي كيتحرك فالكواليس باش يفرض واحد الواقع خطير، تيفسر علاش التعليم ديالنا غادي اللور رغم خطابات الملك، ورغم جهود الحكومة، ورغبة المغاربة أنه تكون عندنا مدرسة مقادة وفيها شوية ديال الجودة، فالوقت لي واحد النوع ديال المسؤولين مشغولين بمراكمة ثروات الصفقات والبرامج والمشاريع الإصلاحية، وهاذ الشي ديال الإصلاح عندهم غي خضرة فوق طعام.