كود – القنيطرة//

الساكنة والتجار لي معنيين بشارع الشاطو فأولاد اوجيه فإقليم القنيطرة، ناضو كيطالبو السلطات المحلية وعلى رأسها المجلس البلدي، باش يتدخلو بسرعة ويصلحو الطريق اللي ولات حفرة كبيرة وكارثية وسط المدينة.

الناس ديال ولاد اوجيه كتبو شكايات رسمية، هضرو فيها على الضرر الكبير اللي وقع ليهم بسبب الحفريات اللي دارتها شركة CTHM وخدماتها بلا ما تكمل الإصلاحات، وخلات الشارع عامر بالحفر، الغبار، والماء الموسخ. الصور اللي توصلنا بها من عين المكان، كتبيّن بوضوح الحالة المزرية للطريق، واللي ولات خطر على الراجلين والسائقين وحتى الأطفال الصغار.

’’ما بقيناش قادرين نخدمو ولا نتحركو”، هكذا قالو بعض التجار، اللي أكدو أن الحركة التجارية ضعفات بزاف، والزبائن كيتهربو من المنطقة بسبب الوضع ديال الطريق.

الشكايات اللي توصلات بها الجماعة وحدا منهم موجهة مباشرة لرئيس المجلس، فيها تأكيد أن الشركة اللي حفرت ما رجعاتش تصلّح كيف ما خاص، وخلات الوضع أسوأ مما كان.

الساكنة كتطلب اليوم بإصلاح شامل للطريق، ماشي ترقيع، وكتحمل الجماعة والشركة كامل المسؤولية على هاد الضرر اللي تسبب فخسائر اقتصادية واجتماعية ونفسية. والناس كتنتظر بصراحة شي تحرك فعلي قبل ما يتزاد الوضع سوءً أو يوقعو حوادث.