كود ـ بني ملال//

الانهيار الجزئي ديال طرف من الجبل فتاسلومت، فالمنطقة الترابية بين الويدان، خلق مشكل عند الناس مني الطريق تسدات لبارح السبت وتوقفات على الحركة، وزادت معاناة السكان والمستعملين ديال الطريق.

ولكن هاد المشكل ما طولش، حيث السلطات المحلية تدخلات بالخف، وتحركو مباشرة ملي وصلهم خبر انقطاع الطريق،

وفوقت قصير جابّو الآليات باش يحلو الطريق وينقّيو الأتربة والحجر. لي طاح، وهكا رجعات حركة السير لطبيعتها وتفكات العزلة على السكان، وهاد الخطوة عجبت الناس بزاف اللي عبّرو على ارتياحهم لهاد التدخل السريع.

مع شتا والثلج لي كيطيح كيوقعو بزاف ديال الانجرافات من الجبل وكيطيح الحجر، هادشي لي خاص ناس لي كيدوزو من تحت الجبل يردو البال مزيان لتزلق عليهم شي حاجة من الفوق.