كود تطوان//

عرفات الطريق الوطنية رقم 16 اللي كتوصل بين تطوان والحسيمة، بفعل الشتا الكثيرة، شلل كامل فحركة السير، بعدما وقعات انهيارات خطيرة فعدة نقط على طول الطريق، بسبب الأمطار الغزيرة اللي ضربات المنطقة.

البداية كانت من جماعة بني جميل بإقليم الحسيمة، فين انهارت قنطرة على مستوى دوار كركر، بعدما جرفات السيول جنبات الطريق، الشي اللي قطع الطريق بشكل تام وخلا العشرات ديال الطوموبيلات والكيران ديال نقل المسافرين محاصرين وسط الطريق ساعات طويلة، بلا ما يعرفو فين يمشيو ولا شنو يديرو.

المسافرون عاشو لحظات ديال القلق والاستياء، خصوصا مع غياب بدائل فورية، قبل ما تتدخل السلطات الإقليمية وتعبأ آلياتها لفتح الطريق مؤقتا وإرجاع حركة السير بشوية بشوية، مع اتخاذ احتياطات السلامة.

ومن جهة أخرى، اضطر عدد كبير من المواطنين إلى تغيير المسار ديالهم وسلوك الطريق الوطنية رقم 2 كحل مؤقت، رغم طول المسافة وصعوبتها، باش يوصلو لوجهاتهم.

هاد الحادث رجع للنقاش من جديد وضعية الطريق الساحلي، اللي كتعتبر من أهم المحاور الطرقية فالمنطقة، ولكنها كتبقى هشة قدام التقلبات المناخية، وكتطرح تساؤلات كبيرة حول جودة البنية التحتية وضرورة تدخل عاجل باش ما تتعاودش هاد السيناريوهات مع كل شتاء.