كود – وكالات//

بزاف د العيالات تيدوزوا نهارهم بين الوقوف فلكوزينة، المقابلة ديال الولاد، أولا الخدمة على برا، هادشي كلو كيخلي الذات تعيا، والرجلين يتنفخوا، والظهر كيضر.

داكشي علاش كاين واحد التمرين، سميتو فاليوغا (Viparita Karani)، او هزان الرجلين على الحيط.،هاد الحركة البسيطة كتعطي نتائج مزيانة.

حيث ملي كتهزي رجليك للفوق، الجاذبية كتعاون الدم والسوائل اللي محبوسين لتحت باش يرجعوا ويدوروا بسهولة لقلب وبالتالي كتمنعي ليفاريس يخرجو.
حسب الدكتورة نيكي رامسكيل، الطبيبة العامة ومؤسسة عيادة متخصصة فصحة العيالات، الأوردة خدامة ديما باش ترجع الدم للقلب، ولكن الجاذبية كتخلي هاد المهمة أصعب، خصوصاً ملي كنكونو واقفين ولا جالسين وقت طويل ,ومع التقدم فالعمر، الصمامات اللي داخل الأوردة تقدر تولي أقل فعالية، وهاد الشي ممكن يخلي الدم يتجمع فالرجلين ويساهم  فالقصور الوريدي المزمن.

هزان الرجلين، حسب الطبيبة، يقدر يعاون الجاذبية باش تحرك الدم والسوائل من الرجلين للقلب، وبالتالي يعطي راحة مؤقتة اللي كيحسو بثقل أو انتفاخ خفيف فالرجلين من بعد نهار طويل ،وحتى الحيط ماشي ضروري، حيث ممكن تهزيهم فوق كرسي أو شي حاجة عالية.

بالنسبة لي عندهم مشاكل فالقلب أو الكلى أو الكبد، أو ارتفاع ضغط الدم غير المتحكم فيه،  ممكن هاد الوضعية ما تكونش مناسبة ليهم بزاف كتقول الدكتورة.

هاد التمرين كيتعتبر مسكن طبيعي للألم،حيث ملي كتكاي بهاد الطريقة، كتريحي العضلات ديال الحوض وديال تحت الظهر، وكتنقصي الضغط على الوالدة، هادشي كيهدن دوك التشنجات والوجع القاصح ديال دم الحيض.

أما الحاملة ديما كيتقالوا عليها رجليها ويتنفخوا ليها بسبب الثقل ديال البيبي اللي كيضغط على العروقة. هاد التمرين كينقص  المحاين كاملين قبل الشهر الرابع.

حيث الوضعية كتسرح حتى العمود الفقري وكتنقص الثقل على الفقرات ديال تحت الظهر وزيادة على هادشي،  الدم كيتدفق لجهة الكرش والحوض، كيعاون المصران والمعدة باش يخدموا مزيان ويتنقص النفيخ ديال الكرش.

هاد الوضعية روّجات ليها صانعة المحتوى كايتي بريغهام، باعتبارها طريقة سهلة باش تعاون على صحة الأوردة.