عفراء علوي محمدي- كود//

قال الطيب حمضي، الطبيب والباحث في السياسات والنظم الصحية، أن فيروس كورونا المستجد كيشكر خطر كبير على المرأة الحامل والجنين ديالها، بحيث يتضاعف احتمال اللجوء للتنفس الاصطناعي 2,59 مرة، والدخول للإنعاش 18 مرة، ودخول المولود  للإنعاش 5 مرات، كيف كيتضاعف خطر فقدان الجنين 2,8 مرات.

وفحالة وجود أمراض مزمنة كتكون المرأة الحامل في خطر كبر، بحيث كيتضاعف خطر موتها ب15 لمرة إلى كان فيها السكر، وكيتضاعف احتمال حاجتها للتنفس الاصطناعي 64 مرة إلى كانت كتعاني من ارتفاع الضغط الدموي.

وبوجود المتحور دلتا، كتزيد نسبة دخول النساء الحوامل للسبيطارات بسباب كوفيد 19، وكيمكن يتقاسو بيه او يتقاسو بالمتحور ألفا، فوحدة من 5 نساء حوامل كتقاس بالسلالة الكلاسيكية، و1 من 4 نساء يمكن تتقاس بألفا، و1 من 3 يمكن تقاس بدلتا، وبدلتا كيزيد احتمال فقدان الجنين ب2 مرات بالمقارنة مع متحور الفا.

باش نتجنبو هذشي كامل، حسب حمضي، خاص تلقيح الحوامل والمرضعات، بحيث الاستجابة المناعية للقاح بالنسبة للنساء الحوامل كتعادل الاستجابة المناعية للنساء اللي ماحاملاتش المصابات بالفيروس.

وكشف حمضي، فورقة بحثية ليه، أن 98 فالمية من النساء الحوامل اللي دخلو السبيطار بسباب الفيروس ماملقحاتش.