عثمان الشرقي – كود //

تشياخات، اللي هي رياضة قبل ما تكون فن ورقص، ديما هي الطريقة باش كيعبرو المغاربة على فرحهم داكشي علاش الشيخة هدى حيدات توني ديال لحسن لخنيفري ولبسات القميص الوطني وشاركات فرحتها فسهرة فنية كبيرة فواحد الجو كان عامر بالشطيح والنشاط، والناس اللي كانو حاضرين جمعو بين فرحة المنتخب لي ربح كاس العالم وفرحة حضورهم الشيخة المعروفة بالطبيبة هدى.

هدى لي كانت مع احوزار قبل ما تمشي مع لخنيفري ولات هي نجمة الفرقة والقائدة لي كتخلي الطايح كتر من النايض بشطيحها و بضحكتها البريئة ، هدى الزوينة احتفلات بكل وطنية صادقة وخذات سيلفيات وتصاور مع الحاضرين اللي شاركوها الفرح، هاد الاحتفال كيعكس حبها الكبير للمنتخب وحسها الوطني لي ترجمتو فرقصات شعبية خلات الجمهور حال عينيه، المتابعين فوسائل التواصل الاجتماعي عبروا على إعجابهم بالروح المرحة والعفوية ديالها لدرجة طالب البعض انها تكون حاضرة فبعتة المنتخب الوطني باش تحفز اللاعبين والطاقم .

هدى لي عندها مشاعر وطنية صادقة بحال جميع الشيخات المغربية لي كايآمنو باللحمة الوطنية ، عبرات من خلال هدى لبسها للقميص الوطني أنها كتبغي تهز درابو د البلاد وتشارك فرحة الانتصار ديال المنتخب.