الرئيسية > آش واقع > الطبا ناضو لرئيس هيئتهم. التبزنيز على ظهر الڤاكسان قبل ما يوصل. دازت صفقة لـ”تي ال اس” اللي غادية تاخد بيانات 50 الف طبيب ومستخدم
13/01/2021 15:30 آش واقع

الطبا ناضو لرئيس هيئتهم. التبزنيز على ظهر الڤاكسان قبل ما يوصل. دازت صفقة لـ”تي ال اس” اللي غادية تاخد بيانات 50 الف طبيب ومستخدم

الطبا ناضو لرئيس هيئتهم. التبزنيز على ظهر الڤاكسان قبل ما يوصل. دازت صفقة لـ”تي ال اس” اللي غادية تاخد بيانات 50 الف طبيب ومستخدم

كود كازا ///

التبزنيس على ضهر الفاكسان بدا قبل مايوصل! واسرار البلاد كتشتت بلا حسيب بلا رقيب. هاد الشي اللي يمكن يخرج بيه الواحد اللي شاف رسالة رسلها رئيس المجلس الوطني للهيئة الوطنية لاطباء المغرب للمجالس الجهوية لهاد الهيئة. هاد الرسالة اللي عند “كود” نسخة منها اخبار باللي شركة اسمها “تي ال اس” غادية تكلف باش الڤاكسان ديال “كورونا ڤيروس” غادية توصل للهيئات. صفقة مدخل فيها شركة خاصة مكلفة دابا بوراق الڤيزات.

رئيس الهيئة دخل شركة. علاش هو اللي عارف. دار هاد الشي قبل ساعات من الهدرة باللي الڤاكسان غادي يوصل نهار الاحد اللي جاي.

اولا هاد الشركة: TLS اللي تعاقدات مع رئيس الهيئة الوطنية للأطباء بالمغرب 72 ساعة قبل ما يوصل اللقاح للمغرب باش هي تتكلف بتسجيل أطباء القطاع الخاص بالمغرب في لائحة التلقيحات وهي تتكلف تاخد ليهم المواعيد… القضية باينة وواضحة ومفروشة…

الخطير كثر من فضايح التبزنيس٬ يقول مصدر من الهيئة ل”كود”٬ هو أن موضوع التلقيح والاقبال على التلقيح والبرمجة ديالو خاصها تكون بايادي مؤسسات وطنية ماشي شركات، حيت حنا فواحد الفترة وموضوع حساس المعلومات فيه عندها طابع سيادي أو بزاف عاد …

علاش القضية مفروشة والشوهة كبيرة؟ حيت من هادي شهرين٬ يضيف مصدر “كود”٬ هاد الهيئة الوطنية للأطباء بنفسها كلفات الهيئات الجهوية للأطباء باش يسجلوا الأطباء فالقطاع الخاص والمساعدين ديالهم باش يتلقحو، وتوزعو مطبوعات وعمروهم الأطباء، وتعطاو ايميلات وتيليفونات وتسجلو الأطباء اللي غيلقحو ريوسهم والمساعدين ديالهم هادي اكثر شحال من سيمانا

مصدر “كود” تساءل: علاش دابا تا لآخر ساعة ويجي رئيس الهيئة الوطنية ويضرب هاد الخدمة كلها فالزيرو ويتعاقد مع شركة خاصة ويعطي للأطباء اقل من 72 ساعه باش يتسجلو عند هاد الشركة وهو عارف ان هادي غير خدمة معاودة وانو مستحيل يتسجلو أطباء القطاع الخاص والمساعدين ديالهم لي المجموع ديالهم كثر من 50 الف واحد فظرف 72 ساعة والشركة ما عندهاش حتى بلات فورم الكترونية للتسجيل بل عاطيانا تيليفون فيكس وسمية ديال موظف واحد لي خاص هاد ال 50 الف يتصلو بيه. هادي التصطية وصافي.

مصدر “كود” اضاف “ايلى كان تليفون وموظف واحد كافي لهاد المهمة را الهيئة الوطنية عندها بزافت الموظفين والهيئات الجهوية كدلك”

دابا خاص كلشي يرفض هاد التخربيق. يخلي ليه الصفقة فعنق رئيس الهيئة. يضيف مصدر “كود”٬ “راه الهيئات الجهوية باعضائها والموظفين ديالها دارو الخدمه ووجدوها … الموظفين هادي هي خدمتهم ، وأعضاء الهيئة الوطنية والجهوية را كياخدو تعويضات كتوصل مليار سنويا … ويزيدو عليها شركة”

هاد الشي خلا غضب كبير وسط الأطباء ومنهم مسؤولين بالهيئات، لي باسميتهم كتجرى الصفقات. ودابا نوضو يا الاطباء دينو هاد التبزنيز يدعو مصدر “كود” صحابو.

موضوعات أخرى

24/01/2021 08:30

تأكيد للي كتباتو “كود” البارح. مصدر رسمي: الوضع فالگرگرات هادئ وحركة المرور مزيانة واستفزازات ميليشيات البوليساريو ما عندها تأثير

24/01/2021 05:00

بعدما سالاو الخدمة نهار تنصيب الرئيس الجديد. الحرس الوطني الأمريكي نعسو فالباركينكَ دالكونكَرس. بايدن: كنطلب المسامحة